21. Sang Samba tan pararianan, rauh ring pucaking adri, raris ida matur alon: "Payadnyane nguda samun, sapasira olih mayasa, mangawitin, ngawangun tapa irika?
22. Gopurane sampun rusak, rauhing ring bale manik, yadin ring jro pura reko, ring merune tumpang pitu, nika (telas) punggel, rupa lami, sang tapa ida nyawarga!"
23. Sang Samba kasob manyingak, pamedale ne menginggil, candi bentar telas rusak, rebah ia lilit ebun, sanggalangite mangrebo, sekar rawit, irit ruksa muyar roma.
24. Pudak cinagane mekar, masawang rasa ninjoin, sekar gadunge mulihan, irib, engsek ring sang lampus, erang dening katinggalin, uyang paling, wiakti ngurambat ing lemah.
25. Togog parase ya bengong, rasa erang katinggalin, sekar pucuk kawirangan, ia delima semu mangu, masanding (ring) i rudita, pada ngeling, minab mangame sang nywarga.
26. Nesekang ida Sang Samba, nyingak patapane luwih, babatur purane kawot, parase maturut-turut, ukirane sarwa endah, nanging sami, rusak rebah kagunturan.
27. Malih ne ring jaba tengah, wenten bale murdamanik, pangungangan sang pandita, nyingak kalangene ditu, kahuban antuk wandira, kehing paksi, mawijah-wijah ring kayun.
28. Paksine umiang asabda, asahuran sleng tambungin, irib ia mangatuang, ring ida sang wahu rauh, perit petingane umiang, liring-tiing, kasarengin lan bucica.
29. Gunadewa ida ngucap, alon ature amanis: ,"Ratu, titiyang mangaturang, piarsayang kawitipun, ne ngawangun sapunika, lintang luwih, apuspata Darmadewa.
30. Ida kawit manaruka, ngawangun puri iriki, sareng rabinida reko, Dewi Yadnyawati kawuwus, putran Sanghyang Citrarata, lintang luih, pradnyan tur satiawacana.
31. Nanging te katuturannya, aturang titiyang ne mangkin, da sang tapi Yadnyawati, kocap ida sampun lampus, sedan idane masatia, katinggalin, antuk Sanghyang Darmadewa.
32. Sang Samba ida mirengang, Gunadewa manuturin, raris ida naneng bengong, ngeling-elingang ring kayun, rabinida Yadnyawati, sane nguni, katinggalin ring patapan.
79
