GAGURITAN SAMBA
PUH GINADA
1. Iseng mangiket crita, nyamurang hati paling, nuju suung padidian, esek manahe ulangun, jemak kertase abidang, katulisin, matembang antuk ginada.
2. Nene mangkin cinarita, ida Dewi Yadnyawati, anak Sang Prabu Utara, kagawuk ida ne sampun, antuk Sang Prabu Naraka, Prayajoti, apuspata Raja Boma.
3. Kaduduk kadamaputra, antuk ida sri bupati, Sahuwusing lami reko, sampun ida nandang duhur, huwus ngarajasawala, rupa becik, satsat Supraba ngindarat.
4. Tan sah (Ida), ingembanan, olih inya bayan sangit, makadi wawenya reko, Nilotama ne kawuwus, putranida Sanghyang Indra, dane ngiring, ida Dewi Yadnyawati.
5. Sahusan ida mapayas, raris ida nabda aris: "Tilotama, kamo luwas, mangalih ida sang kakung, sang kadi Smara ngindarat, Darma Widi, putran Sanghyang Padmanaba.
6. Samalih pireng-pirengan, dija ida manyrawadi, Krana ida ngutang nira, di Malaya ane malu, duke ida nangun yadnya, nira ngiring, sang satsat Sanghyang Smara.
7. Nilotama sahur alon: "Inggih embok lintang ngiring!", Raris ida mamargi reko, pirang dina laminipun, mamargi tan pahiringan, ngentap bukit, tegal jurang kalintangan.
8. Saget ida polih orta, mataken ring watak tapi, sang tapi (ne) mangaturang, Darmadewa ida turun, maring jagat Dwarawati lintang luwih, Sang Samba kasub ring jagat.
9. Putran ida sang Kesawa, bupati ring Dwarawati, Sanghyang Hari nyalantara, jananuraga manerus, makapanyungsungan jagat, kasub sakti, kinatwangan ing nagara.
77
