PUH DURMA
1. Sapunika purwanya nguni ucapang, sangkana kayang jani, yen kalaning luas, masusupan di alas, di tegal di bete sripit, masih ucapang, Sang Astika kapuji.
2. Tuturanya mangde tuara kabancana, kagutil ban lelipi, apan Sang Astika, mula santanan naga, kalih polih miutangin, awinan usan, sarpayadnyane nguni.
3. Krana ada naga enu magantulan, kaucapang kayang jani, ento mangadakang, lelipine makejang, tekaning lelipi lidi, masih santanan Sang Naga paling cenik.
4. Ambul to baan midartayang ngungguhang, ne ada buin akikit, satua cecarangan, duk gumine nu rundah, tonden ada ratu siwi, kene purwanya, temben ratune nguni.
5. Ida Betara Wisnu waluya maraga, dadi ratu malinggih, di Medang Kayangan, kaucap mapesengan, sira Hiang Manu ne kasiwi, di desa Medang, Ida mangwangun sami.
6. Tatakrama tingkah ratune makejang, katami kayang jani, yan buatning sastra, Ida Bagawan Biasa, irika ngwetuang sami, kang midartayang, tekening tuuh bumi.
7. Uli irika tuuh gumine ngeka, makrana kayang jani, ada kaucapang, icake kawilangan, mangitungin tuuh gumi, uli di Medang, buat temuang nembenin.
8. Ida Hiang Manu kocap madue putra, nyeneng ratu siniwi, di negara Medang, waluya Sanghiang Smara, Ida tumurun ngraganin, Sang Kameswara, pasengane Sang Aji.
9. Ida Hiang Manu kocap madue putra, Betara Darma wiakti, tumurun waluya, dadi ratu di Medang, sangkan pesengane masih, Sang Darma Wangsa, di jagate siniwi.
38
