PUH SINOM
1. Ambul to bukti kandanya, Saprayadnya ring nguni, Sang Astika mangusanang, awinan dadi pramangkin, usan yadnyane wiakti, apan titah Sanghiang Tuduh, ngaryanang mangde ada, Sang Astika tuah kapuji, katurgenah, pacang mangusanang yadnya.
2. Sapane kene mimitanya, Batara Brahma ne nguni, sedek katangkil mangraosang, yan wenten pacang ngrauhin, pakewehe tan sipi, mangdene nagane gempung, teked kadewatan, geseng manyeburin api, yan Sang Prabu, Janamejaya ngraosang.
3. Pacang ngwangun Sarpayadnya, merang ring ajine nguni, kadilan antuk Taksaka, mangdene sida mapulih, punika kayatnain, antuk Batara kapungkur, awinan kraosang, upayane ulih mangkin, mangde wenten, pacang manyangkalen yadnya.
4. Sedek Sang Anantaboga, irika sareng menangkil, Betara Brahma nguduang, mangdene Sang Naga bumi, madue putut ulih, istri Brahmana aukud, lanang baguse ngonyang, punika pacang kawidi, mangusanang, sarpayadnyane pungkuran.
5. Sampun tatas kapiragiyang, Sang Anantaboga raris, mantuk sampun sami budal, Sang Anataboga raris, manyimpen jeroning ati, apan madue putra sampun, asiki mapasengan, Sang Nagini kari alit, listu ayu, nongos di saptapatala.
6. Keto katatuannya kocap, pangraos Betara nguni, krana ada Sang Astika, kene mimitanya wiakti, wenten Brahmana luih, maparab Sang Jaratkaru, pagehing tapabrata, jenek di patapan nitik, teken tutur, nyaluk brata matrisandia.
7. Pageh teken pangandika, mawanan tan parabi, yan tuara patuh pesengan, tuara pacang ngalap rabi, keto purwanya nguni, kocap Sang Jaratkaru, sedek kalunta-lunta, mamargi mlali-lali, saget rauh, kaajatanastana.
34
