29. Tandua raris pramangkin mamargi, manglembayang, mawesa brahmana, pandita sampun warnane, mateken ban bragu, mabawa slimpet maganitri sampun rauh di jalan, saget macunduk, Ida Bagawan Kasiapa, Sang Taksaka, wruhing cestekara sari, sampun kawalulayang.
30. Sang Naga Taksaka mangriinin, raris nyapa, "Inggih Sang Kasiapa, kija pacang, pamargine?" Sang Kasiapa masaur,"Manira ka Astina negari, sadia pacang nyedayang, manawar Sang Prabu, apan Ida ayatannya, I Taksaka, dinane jani mangutil, Sang Prabu di Astina".
31. Sang Taksaka raris pramangkin, ngwalulayang, masaur pragalba, "Ira suba I Taksaka, pacang ngutil Sang Prabu, di Astina melah ne jani, dini sube pandukang, kasaktian kasub, manandingin I Taksaka, pacang nawar, ento ada jadma ngandik, jani ira gesenga".
32. Lantas kadilan jadmane ngandik, kayu roda, antuk Sang Taksaka, pramangkin tan pagantulan, geseng mandadi awu, teken punyan kayune bresih, tut ring awune brasta, tan pagatra enu, Sang Naga Taksaka raris, mangonkonang, Bagawan Kasiapa keni, mangelisang manawar.
33. Bagawan Kasiapa raris gelis, mengregepang, puput ring adnyana, raris kagelang ajahan, jadmane ngandik bau, saget buin waluya ngandik, buka tuara nawang, dewek pecak puun, tan dumade Sang Taksaka, ngaksamayang, ngasorang raga pramangkin, ring Bagawan Kasiapa.
34. Pranamya ature nunas kanti, ring Bagawan, Kasiapa sang Dwija, "Inggih Bagawan Kasiapa, titiang nahen pisan sampun, kasor pisan antuk kasaktian, ne mangkin titiang wantah, nunas mamilaku, sisip nunas nyidayang, mangde entas, sapane Bagawan Srenggi, mawates pitung dina.
35. Puniki titiang ngaturang ciri, sarwa mulia," Raris kawangsulang, mas manik winten mabiok, wenten ulihan awakul, raris katurang pramangkin, ring Bagawan Kasiapa, mangdene mawantun malih mantuk ka patapan, tan nyidayang, manawar Sang Pariksit, di Astina Negara.
36. Bateka antuk sapane dening, sang wakbajra, tong dadi andegang, dadi Bagawan Kasiapa, pakayunane metu, gumugutan
17
