Kaca:Nemoe Karma.pdf/50

Saking Wikisource
Kaca puniki kavalidasi

48

poelar basang Ni Ratnané kedék, djantos medal tojan paningalanné, santoekan ngeton I Sangga, bek maroewés-roewés antoek endoet, lima kalih boentoetipoené, sakadi makasoet selem. I Sangga kenjir-kenjir kéwanten sarwi nampekin Ni Ratna, misadia ngedih toja patjang anggén ipoen mabaseh. Waoe Ni Ratna ngambil tjédok djagi njéndok toja, wénten soeara piragin ipoen sapoeniki.

— ,,Jéh, kakoediang beli Gedéné Loeh, katoeloedang lada ija sangkal kéto belokotan adji endoet?”

Malih Ni Ratna ngawalinin kedék ngelkel, sambilang ipoen masaoer.

— ,,Sing, bangka tiang sing dja ngénkénang apa ijané, boedoeh koeda tiang mé. Apa koné salah i beliné kétoang tiang.”

— ,,Men, singa, enjén ngétoang ija?"

Irika raris katoetoerang indikipoené, sakadi patoetné pisan. Béh, malih mawali kedéké, mabrijoek sinarengan, jén rasajang tan bina sakadi koewoegan ombak sagarané, mempoegan ring batoe parangané, Sané nakénin poenika, tan lian ring mémen Ni Ratnané, ipoen waoe raoeh saking pasar, toer mamoeat bablandjaan, djantos das oeloeng bablandjaanipoené. dawegé kedék oengkat-oengkit. Doek ipoené makedékan asapoenika, raoeh sané noeenang oemahé mitaoe I Sangga, wénten anak ngrereh ipoen njantos diwangan ring marginé. I Sangga gelis njagdjagin medal, dapetanga raramané moeani njantos diwangan.

— ,,Dong I Sangga, dadi ban tjai makaad tan pawangsit, ninggal anaké boeka bapa. Nganti bedjad bapa njrepang tjai, oeli i nem boelan, mara djani tjai tepoekin bapa dini. Djangka telah ban bapa njeloepsoep goeminé, teked ka Karangasem, ka Djembrana pada. Né djani bapa teka oeli di Boeléléng, i teloen bapa soeba kema.”

— ,,Doeh bapa, boeat ento iwang ban tiang masolah, pamekasné eda bapa sanget njoengkanang, sampoera pisan di kajoen bapané, indik kaiwangan tiangé?"

— ,,Sing, bawakné tjai ké eda sanget ngamboelang oendoeké ané soeba! Djani djalan tjai moelih, bapa soeba tjoemawis djoemah, tekéning apa loewiré ané ngranajang tjai ngamboel boeka djani!"

— ,,Sapoeniki bapa, jan teka dados, béndjang tiang ngiring