Kaca:Nemoe Karma.pdf/25

Saking Wikisource
Kaca puniki kavalidasi

23

— ,,Nah, jan boeat kétoné tiang ngoegoe pesan raos emboké, krana kéto dong ké mirib sing dja ada ané toeara manoet tekèn papatoetan goemi. Nah, jan boeat raos tiangé marep tekèn i beli, anak tiang ngraos patoeroe moeani, dadianja sing beneh tiang marengang embok awak loeh, boeina sing dja taoe-taoe. Wirèh djani i beli toeara djoemah, boeina tiang soeba ianang embok papastén pesan, tiang moelih djani, manian tiang boein teka ngalalinin embok mai. Jan toesing alang boeka i apa, mèh ké kajang adin emboké mèmèn i tjening djoemah bareng adjak tiang mai.”

MATOENGGOEANG PIANAK.

Kotjap pamargin Pan Soekreni poenika, sampoen raoeh ring pasar Badoeng, ngraris ipoen klintjak-klintjak ngetonin poenika poeniki, sarwi taler matatoembasan poenapa-poenapi, sané magoena ring déwékipoené. Ri sedek Pan Soekreni noembas kopi, ratis wènten anak ngendikin ipoen saking poengkoer, Waoe ipoen matolihan, engon pisan ipoen ngeton goban Pan Soedanané kembang atjoem, sarwi mapadjar.

— ,,Bah, beli waja mar djenenga, sangkal kéto ketjoet pesan. Mai té beli negak maloe, djalan madaar. kopi bareng-bareng!"

Ring sampoen ipoen oewoesan neda kopi, raris ipoen magingsir genah, masangidan ring genahé sané sepi. Irika ipoen mararaosan sareng kalih, Pan Soedana miwah Pan Soekreni. Pan Soodana raris ngariinin makroena ring Pan Soekreni.

— ,,Pan tjening waja sanget pesan sebeté tekèn oekoedan beliné?"

— ,,Sing beli, to kènkèn awanan beli tjedok tekèning panoemaja? Boeina moelih nganginang masih beli toesing taén, pelan soeba lima boelan maklonné.”

— ,Ah, latjoer Pan tjening, djenenga moela saking balèki Widiné tekèn oekoedan beliné.”

— ,,Kènkèn awanan kéto beli?”

— ,,Kènè cendocké. To njaman Pan tjeningé djoemah, somah beliné djani, pinehin beli liwat beneng papinehné, krana beli èdalem pesan njetè tekèn ija. Toer beli sing gigis-gigis djengahé tekèning oekoedan beliné padidian.”

— Apa beli krananné?”