Pustaka utawi buku sané mamurda Makudang-kudang Drama Bali kawiaktian ipun kapupulang olih I Gusti Ngurah Bagus tur sampun kamedalang daweg warsa 1989, sakéwanten kahanannyané kari marupa buku stensilan turmaning nganggén sikut kertas folio. Carita drama sané mungguh sajeroning buku puniki kepah dados kalih soroh, inggih punika pahan sané kapertama, carita drama soroh Drama Gong, makasami kakawi olih Ketut Putru saking Desa Banyuning, Kabupaten Buléléng luiripun: "Dalem Bungkut", "Sampik", "Larasati", "Panji Raras", lan "Prabu Rancang Kencana". Pahan sané kaping kalih, carita drama soroh Drama Bali Anyar sane kakawi olih Nyoman Manda mamurda "Masan Cengkéhé Nedeng Mabunga" lan "Kuuk", olih I Nyoman Nada Sariadha mamurda "Sari", olih Nengah Segatri mamurda "Semun Langité Kantun Sendu", lan olih I Gusti Putu Sukardi mamurda "Keris Pustaka".
Ngeninin indik kahanan buku sekadi sampun kawedar ring ajeng, punika taler indik dagingnyané sané mabuat pisan tur pinaka cihna kauripan lan panglimbak seni dramané ring jagat Bali. Inggian punika, ring tepengan sekadi mangkin, Balai Bahasa Provinsi Bali nyétak buku puniki néntenja tios wantah kadasarin antuk manah urati ring kalestarian carita dramané ring Bali.
Drs. I Wayan Tama,
Kepala Balai Bahasa Provinsi Bali
