Makudang-kudang Drama Bati
Gusti Gdé Murka : "Sampun janten Ratu Anak Agung. Kabekan sawa ring sétrané, pajlimpang. Jin, sétané ipun ngelah pamuktiané. Léak sami mokoh, kembuhan pabuktian. Sané jengahang titiang ring manah, rikalaning ipun I Jelantik mapunyah-punyahan. Pura, Sanggah saluiring genah sané suci sami kaguragada. Panjak-panjaké tan kawéhin maturan. Asapunika taler upacara, upakara adat agama tur sané siosan sami tan kawéhin. Sané purun mamurug, kapaid cicingan."
Prabu Semarapura : "Aduh! Sing pesan nganggon keneh kamanusan. Tidong jlema. Aéngan teken raksasa I Jelantik totonan."
Gusti Gdé Murka : "Mangkin, panjak palungguh I Ratu ring Nusa sami paserah. Sakéwanten ring manah ipuné tan mari kasakitan, gelur-gelur. Nunas suécan Widhi, nunas prejuru sané wicaksana, sané wiakti ngardinin kerahayuan jagat."
Prabu Semarapura : "Béh, pelih panarka saja gelah. Ané suba liwat paragat gelah ngugu munyin I Jelantik. Apa buin bani masumpah di kayangan tiga. Ia masumpah sanggup ngawangun jagat Nusa, ngardi kalanduhan wiadin kerta raharja, luput tekén pangeristan liak lawan buta kala dengen."
Gusti Gdé Murka : "Bilih-bilih sumpah punika, kadi baos Palungguh I Ratu, sidimandi?"
Prabu Semarapura : "Suba karuan, nanging ada ané nyelengkadin keneh gelahé. Ento keris pustakané I Pancering Jagat enu gisina tekén I Jelantik. Yén pradéné ia ngedokin sumpahné, sing buungan lakar ia salahang Dewa!"
Gusti Gdé Murka : "Manawi kirang pangaci-aci ka luhur. Boya jagat Nusané sampun kaloktah indik aji ugig, kaloktah indik pangeliakan. Pingkalih, Déwan Grubugé malinggih irika, duaning maéndah-éndah panyungkan-panyungkané. Yan tan iwang, derika malinggih Ratu Gdé Macaling, Dalem Nusa, Ratun Grubugé miwah Wong Samaré.
210
