II Drama Bali Anyar
Undagan 1
Putu Latri: "Th, ...iba jlema muani pongah juari. Malaibang icang ané suba ngelah kurenan. Uli goban cainé dogén suba tawang icang, isin keneh cainé ngambekang tingkah karaksasan. Uliang,... uliang icang ka umah kurenan icangé."
Wayan Lumut : "Dadi uliang...delap ngejuk lakar anggon somah."
Putu Latri : "Alihang iban cainé ané lénan. Ngudiang iba nglaksanayang gaé ané nglanggar hukum."
Wayan Lumut: "Hukum apa? Hukum pagaén jlema, ...anak dadi bayah baan pipis."
Putu Latri : "Kolot jlema kolot, tuara taén ngenjek sekolahan. Uliang kai buron...raksasa."
Wayan Lumut : (Kedék). "Béh, ...da ja nyedanin timpal. Beli orahang luh ngaba tingkah buron, raksasa...Beli tusing makebetan. Sawiréh ané ngorahang kéto, masi ja patuh cara Beli."
Putu Latri : Patuh? Patuh kénkén orahang cai?"
Wayan Lumut : "Kadén luh tamatan hostés paling kasuba di Surabaya. Yén ada anak luh, nganti lebihan tekén selaé ngayahin anak muani...matingkah apa ento adané. Apa ané luungan tekén tingkah raksasa?"
Putu Latri : "O,...buat totonan...nagih ubad-abit cai? Nasib icangé nista buka kéto, masi ulian bangsan cainé muani-muani, ubuh mémé-bapa, ludin belog. Dadi pesan atiné bangsan cainé nguluk-uluk icang ngadep tekén jlema muani kaung ajagan. Sangkaning totonan idupé dadi kakéné."
Wayan Lumut : "Nyén ngugu munyin sundel. Da luh uju-uju nuduh anak muani. Ulian luh-luhé ané pelih. Buktiné..."
Putu Latri : "Apa ...apa buktiné?"
Wayan Lumut : "To, ...yén ada rasia uli pamerintah. Para WTS dogén ané gundule tur penjaga di Kompasé wiadin entunganga ka Plaga. Ento nyiriang wi
287
