II Drama Bali Anyar
Wayan Otar : "Aget kénkén ento, Beli?"
Gurun Gedé : "Aget masi liu enu bapak-bapak pemimpin gelahé ané mapekayun jujur tur celang ngetaraang sakancan kacorahané. Ento suba raos tur bukti ané uli makelo kaacep olih rakyat Indonésiané."
Wayan Otar : "Yén kéto ... sing, liu suba pegawé-pegawéné ané kasuudang magaé?"
Gurun Gedé : "Liu pesan. Di tongos Beliné magaé, di kantor Agraria, suba tatelu ané suudanga. Ané buin besik nu kapriksa."
Wayan Otar : "Aduh, déwa ratu, ... yan saja kéto, amat ya, liang manah I déwék dadi rakyat jani. Tusing sedeng buin sangsaya tekén pakayun pamerintahé ané lakar nandan I rakyat nuju ka jagat Pancasila ané adil makmur kerta raharja. Idup I déwék lakar setata pakedék-pakenyung."
Gurun Gedé: "Kéto sajan suba, Wayan. Sakéwala, ané pinih utama ané perlu pesan karesepang olih rakyat, sajeroning jagaté nguangun, ento ane madan paras-paros salunglung sabayan taka. Kerja gotong royong artiné cara raos janiné."
Wayan Otar : "Bé ... dadi tusing kresep baan tiang Beli? Tegarang bang tiang conto-conto ané aluh baana nerima teké polon tiangé."
Gurun Gedé : (Kedék) "Artin gotong royongé tusing tawang, Wayan? Sangsaya rasané Beli madingehang petakon Wayané. Cara anak belog bungkling rasayang Beli."
Wayan Otar : "Gumanti tuah tiang tusing nawang Beli. Kimud pesan tiang ngenehang kabelogan déwék tiangé. Apa, yan kulkul banjaré makluntung tur I déwék pesu negen tambah mabersih-bersih, dadi orahang gotong royong?"
Gurun Gedé: "Néh... dong boyané suba. Patakon Balang Tamak ento adanné. Suba nawang tuwi matakon buin."
Wayan Otar : "Kéné, Beli... ané tusing karesep baan tiang,
265
