II Drama Bali Anyar
"Semun Langité Kantun Sendu"
Olih Nengah Segatri
Paos Kaping Siki
(Kacarita mangkin ring umah ipun Gurun Gedé Murdana ring Banjar Pandé, susunan wewangunan ipuné, sekadi umah-umah Baliné, sané riin, wénten balé gedé sakekutus, balé dangin, miwah balé dauh. Balé dauhé punika, sampun marupa kantor sekadi wewangunan cara mangkiné. Sané mangkin, Gurun Gedé sedekan negak ring kamar tamiuné ring balé dauh. Rikala sedeng itehé ipun negak, sagét wénten tamiu rauh).
Undagan 1
Wayan Otar: "Beli Gedé Beli Gedé."
Gurun Gedé : "Nyén ento... mai mulihan."
Wayan Otar : "Tiang, Beli Gedé."
Gurun Gedé: "O,.... Wayan. Mai negak malu."
Wayan Otar : "I, ... i mbok jumah, Beli?"
Gurun Gedé: "Tusing. Ia kapah pesan jumah. Anak ada dogén itunganga."
Wayan Otar : "O, ... buina, ... tuah ja dina Redité jani. Ka, ...kaliapa miribang teka Beli?"
Gurun Gedé : "Mai ké malu negak. Da majujuk di obog-obog jelanané. Dadi Wayan kememegan ngraos? Apa katakutin?"
Wayan Otar : "Oh, ... sing, ... sing, Beli Gedé. Kénkén munyin tiangé? Ngejer?”
Gurun Gedé : "Aa, ... sada ngejeran abedik."
Wayan Otar : "Béh, miribang tiang, ulihan liunan kena angin. Sawiréh gaginan tiangé di jalané dogén."
Gurun Gedé :"Béh, saja, makelo tusing taén katemu. Apa dogén gaginan Wayan jani?"
Wayan Otar : "Jani dadi tukang catut Onda, Beli. Ladné, tiang ka uma dogén, tekén dadi sri empu."
Gurun Gedé : "Ah, dadi sri empu kénkén ento."
263
