II Drama Bali Anyar
Budi : "Nénten wénten, Pak."
Kobar : "Lengeh! Omong cainé tusing jujur. Awaké sumangsaya gati tekén unduké né jani. Hé, antiang. Ditu negak! Da malaib. Né bedil misi pélor. Gangsaran palaib péloré tekén palaib cainé. Dija jani Sari?"
Budi : "Wau pisan macelep."
Kobar : "Ingetang! Da malaib. Lakar katakonin malu I Sari. (Macelep) Hé, kija lacuna? Lengeh, lengeh. Patuh gati cara méménné. Jendélané ento mampakan buin. Pasti pesu uli ditu masi. Lengeh,lengeh. Méong poléng! (Pesu buin) Hé, budi nyén ngelah rerambangané ténénan? Da tusing ngaku. Awaké gedeg jani. Gedeg gati. Lakar tuntut dogén. Liu pelih cainé. Sa, macelep kaumahé ténénan disedek awaké tusing jumah. Dua, melaibang I Sari, cai matangkep. Lantas anak lén tundén cai. Telu, cai ngrampok dini."
Budi : "Tiang tan malaibang I Sari, Napi malih ngrampok Tiang tan purun."
Kobar : "Beler. Dusta tusing ada ngaku dusta."
Budi : "Tiang wantah matemu sareng I Sari."
Kobar : "Alasan dogén. Hé, cai nanggung kaselamatané I Sari. Kéto masi barang-barang awakéné ané ilang. Cai tuah ngaé uyut dini. Rusuh bikasé. Ngrampok."
Budi : "Napi buktinné tiang ngrampok, Pak?"
Kobar "Bukti? Apa ento duur méjané? Ento bukti nyegog duur méjané. Kotak ané pejang cai duur méjané. Ento buktin cainé ngrampok dini."
Budi : "Niki kotakné Sari."
Kobar : "Cai maling kotakné Sari?"
243
