I Bagus Diarsa ia nuut sapangandikan Ida Betara. Tusing makelo ia di jalan, nget teked jumahne. Ane luh kendel pesan kenehne, mara kurenanne teka, lantas ia matakon, "Kenken beli, seger I Cening?"
I Bagus Diarsa lantas masaut, "Apa seger, anake odah ento Betara Siwa nyen. I Cening jani ditu mamarekan". Kurenanne ngon mara ningeh munyin Bagus Diarsa keto. Jani I Bagus ngenggalang ka peken meli guungan anggona nekepin siapne. Tur bungane pejanga sig bokorane. Nyananne I Bagus Diarsa nuturang buat tingkah purin Ida Betara Siwa. Makejang ane tepukina tuturanga teken ane luh.
Jani critaang tajene di bancingah suba paak, makejang anake pada ngayah lakar menain kalanganne. Buin mani lakar tajen, petenge anake pada ngecelin siapne. Soroh dagange suba pada itep menain daganganne, apang ada adepa buin mani.
Kacrita jani suba semengan, anake suba tragia ngaba siap, tur soroh kelian muah perbekel makejang pada itep ngitungang anake ane ngaba siap, ane patut dosa miwah ane tusing dosa. Sasubane makejang pada teka, lantas anake ngawitin nandingang siap. I Bagus Diarsa masih nyeluk siapne, sabilang anjurina siap anake, makejang jerihina. Liu anake ngomong kene, "Yeh Diarsa siap jerih abana ka tajen". Nanging I Bagus Diarsa tusing ngrunguang pangupet anake keto, nu masih ia nandingang siapne. Undukne ento, cingakina teken Ida Sang Prabu, lantas Ida ngandika, "Ih cai Diarsa, mai tandingang siap caine!" I Bagus Diarsa maakin Ida Sang Prabu, tur katandingin siapne teken ayam Sang Prabu. Siap I Bagus Diarsa jerih. nanging masih kaklesitin (kakelegin) apanga nyak galak, krana ia jejeh kaduken. Makelo - kelo, nyak siapne galak, lantas payu. I Bagus Diarsa lantas ka sisi najinin siapne. Duene masih ada juru kembar najinin. Suba pragat mataji, lantas siape katengahanga.
Ida Sang Prabu lantas ngandika, "Ih Diarsa, kuda siap caine metoh?"
I Bagus Diarsa lantas mesuang bunga ane kaicen baan Ida Betara. Bungane ento nget makejang dadi mas, slaka, inten, berlian muah sesocan ane melah-melah.
I Bagus Diarsa lantas matur, "Amuniki, ayam titiange metoh". Ida Sang Prabu ngandika sinambi ica, "Ah, ah, ah, ah, nah
- 87 -
