Kaca:Kembang Rampe Kasusastran Bali Purwa Buku 1.pdf/74

Saking Wikisource
Kaca puniki kavalidasi

13. I PUCU N G


Kacrita di Banjar Kawan, wewengkon Koripan ada anak pacul

ngelah pianak muani adiri madan I Pucung. Gegaenne I Pucung

sing lenan teken mapikat dogen di umane, nangingke nyalah utu

pesan tangkepne mapikat, di masan padine mara embud. Dadi sing

pesan kone ia taen maan kedis, dening tusing ada kedis ngalih

amah, krana padine nu puyung. Dening keto, med kone ia ma-

pikat. Jani demen kone ia teken kuluk. Nanging masih keto, sa-

bilang nagih ngidih konyong sig pisaganne begbeg konyong ane

mara lekad dogen nagih idiha. Dening konyongne ane nagih idiha

nu cerik buina tonden ngedat, kadena konyongne ento buta, dadi

buung dogen ia ngidih konyong. Dening keto undukne I Pucung

gedeg kone ia, dening makejang kenehne tuara ada maisi. Uli sekat

ento tusing pesan kone ia taen kija-kija buin, begbeg nyingkrung

dogen jumahne. Ping kuda-kuda kaden suba bapanne nglemekin,

apanga ia nyak nulungin ka carik, nanging masih ia tusing nyak.

Dening keto gedeg kone bapanne, nanging ia tusing bani nigtig

wiadin ngwelin I Pucung, krana ia suba kelih. Depina dogen kone

ia jani pragat nengnenga dogenan.

Makelo-kelo demen kone ia teken anak luh, nanging gede kone

kenehne, nget putran Ida Sang Prabu Koripan kone demenina. Budi

morahan teken bapanne sing kone ia joari, dening ia suba ngasen

teken dewek gedeganga, Dadi ibuk pesan kenehne I Pucung ngeneh-

ang Ida Raden Galuh, mabudi ngalih ka puri tusing bani. Jani

ngae kone ia daya, mangdena ia nyidaang makatang Raden Galuh.

Sedek dina anu, ka puri kone ia tangkil ring Ida Sang Prabu.

Di mara ia neked di bancingah, ada kone parekan tepukina ditu

lantas ia ngomong, "Ih jero parekan, nawegang tiang nunas tulung

ring jerone, wekasang tiang ngapuriang, aturang jagi tangkil ring

Ida Sang Prabu!"

Masaut parekane, "Inggih mangda becik antuk tiang ngaturang

ring Ida Sang Prabu, Jerone sapasira?"

"Aturang tiang I Pucung saking Banjar Kawan!" Majalan

lantas parekane ento ngapuriang matur ring Ida Sang Prabu,

"Nawegang titiang mamitang lugra ring Palungguh Cokor I Dewa,

puniki wenten kaulan Palungguh Cokor I Dewa saking Banjar Kawan,


-71-