9. I RAREANGON
Ada anak cerik muani madan I Rareangon sai-sai kone ia
ngangon kebo. Sambil ngangon sai-sai ia ngae wayang-wayangan
di tanahe. Ban sai-sai keto dogen gegaenne, dueg kone ia ngae
wayang muah gegambaran, nganti ngon pada timpal-timpalne ane
ajak-ajaka ngangon.
Sedek dina anu ngae kone I Rareangon gambar anak luh di
tanahe. Ban jegeg goban gambare ento, tusing kone usapa, lantas
adanina kone gambare ento I Lubangkuri.
Kacrita Ida Anake Agung sedek maalon-alon matetulupan,
rauh Ida di tongos I Rareangone ngangon, kapanggihin lantas
gegambaran I Rareangone ento. Angob Ida Anake Agung ngaksi
gambare ento, dadianya kandikain pangangone makejang, "Cerik-
cerike nyen ngae gambare?"
Aturanga lantas teken pangangone," I Rareangon".
Ngandika Ida teken I Rareangon, "Rareangon, cai ngae
gambare ne?"
"Inggih titiang".
"Dija cai taen nepukin anak luh buka kene, orahang teken
gelahe!"
"Titiang matur sisip Ratu Dewa Agung, tan wenten pisan
titiang naen manggihin jadma mrupa asapunika".
"Men dadi cai bisa ngae gambar I Lubangkuri?"
Matur I Rareangon,"Punika sangkaning titiang ngawag-awagin,
Ratu Dewa Agung".
"Ah gelahe tuara ngugu, kema alihang gelahe I Lubangkuri,
yan cai tuara nyidaang, mati polon caine!"
Mara keto pangandikan Ida Anake Agung, ngeling lantas I
Rareangon mulih, kebonne kutanga di pangangonan. Teked jumahne,
takonina kone teken memenne, "Kenapa cai dadi ngeling, Cening?"
Tuturanga lantas undukne, kapangandikaang ngalih i Lubangkuri
teken Ida Anake Agung. Sedih kone bareng memenne.
Kacrita jani petenge, mara I Rareangon pules, lantas ia ngipi
katurunan Betara. Ngandika kone Ida Betara teken I Rareangon,
- 44 -
