Kaca:Kembang Rampe Kasusastran Bali Purwa Buku 1.pdf/30

Saking Wikisource
Kaca puniki kavalidasi

5. I BALUAN


Ada kone tuturan satua I Baluan.

Kacrita sedek I Baluan tangkil ring Ida Sang Prabu Singa,

ratun burone makejang. Ngandika Ida Sang Prabu, "Ih cai Baluan

apa ada tunasang cai teken icang?"

Raris matur I Baluan, kene aturne, "Inggih Ratu Sang Prabu,

tunasang titiang ring Palungguh Cokor I Dewa, punapi ipun I

Blatuk, dados nyabran raina ngebug kulkul, gumanti ribut kaulan

Palungguh Cokor I Dewa, sawireh tan wenten pasal punapa-punapi.

Punika sane tunasang titiang, sapunapi sapatutne I Blatuk punika".

Ngandika Ida Sang Prabu, "Nah cai Baluan, yaning saja keto

tingkah I Blatuke, kema suba cai mulih, nanging orahin I Blatuk,

semengan apang suba nangkil ka puri!"

Raris matur I Baluan, "Inggih Ratu, titiang pacang mapamit

mangkin".

Kacrita di jalan raris kacunduk ipun ring I Blatuk, tur ngomong

kene, "Ih ne sedeng melaha cai tepukin icang dini".

Masaut I Blatuk, "Man, nguda Baluan?"

Kasautin olih I Baluan, "Wih, cai buin mani semengan, ka-

pangandikaang tangkil ka purian, saking pangandikan Ida Sang

Prabu".

"Kenken mawinan tumben Ida Sang Prabu madedauhan", keto

pataken I Blatuke teken I Baluan.

"Buat ento icang tusing nawang, mani ditu tunasang di purian".

"Nah yan keto, icang ngiring sakadi pangandikan Sang Prabu".

Ditu pada-pada belas pajalanne pada ngungsi ngamulihang. Sasuban-

ne I Blatuk teked di jumahne, engsek pesan kenehne kanti tuara

nyidaang pules.

Gelising satua, enggal, kacrita suba lemah lantas I Blatuk

ngireang lakar tangkil ka purian. Sasubanne pada genep bebekel-

annyane, laut ia majalan.

Tan kacrita di jalan, jani suba ia teked di purian, katuju Ida

Sang Prabu Singa sedek mlinggih di bale panangkilan, katangkilin

antuk para yogiane. Laut I Blatuk matur saha sembah. Kene aturne,

"Inggih Ratu Sang Prabu, titiang naweg matur mamitang lugra".


-27-