sungkan saking lami pisan, tan wenten jadma nyidaang nambanin. Yan akudang-kudang balian nambanin taler tan wenten nyidaang. Asapunika makawinan titiang rauh ring alas puniki. Yan jero anak "odah sueca, patujuhin ja titiang, ring dija wenten gagak petak?"
Lantas masaut anake odah, '"Uduh Cening, dini tusing ada gagak petak, kemo laku kelod kangin, ditu ada umah Rangsasa, nanging Cening da jeg macelep mulihan, yan bangun I Rangsasa sinah Cening tadaha. Antiang main buin akejep apang makruyuk dogen siape, yen suba makruyuk siape mara Cening majalan, apang Cening tusing paling ngalih umahne".
Gelising tuturan satua, suba liwat tengah lemeng lantas makruyuk siape mara acepok, lantas mapamit I Bintang Lara teken anake odah, tur majalan ngelod kanginang dogen, teked lantas di umahne I Rangsasa, ngatuju I Rangsasa pules, tepukina lantas cucunne I Rangsasa sedek nyakan, madan Ni Cili.
Ditu lantas Ni Cili matakon, "Ye adi Bintang Lara, apa kalih mai tumben?"
Masaut I Bintang Lara, "Inggih embok, makawinan titiang mriki, titiang kandikaang ngrereh gagak petak ring Ida Anake Agung pacang anggen Ida tamba".
Masaut lantas Ni Cili, "Nah yen keto, macelep malu dini di batune masepak, buin akejep bangun I Rangsasa". Dening keto, lantas ajaka teken Ni Cili I Bintang Lara di batune masepak, "Ih iba batu masepak enggang iba enggang!" Enggang lantas batune masepak, clepanga lantas I Bintang Lara, di subanne macelep buin ngep batune. Suba keto, lantas bangun I Rangsasa, dening mrasa seduk basangne lantas kaukina cucunne, "Cucu, Cucu Cili, manusa ambunne".
Masaut Ni Cili, "Dong Kaki, dija ja ada manusa bani mai". "Nah yen keto jemakang kaki nasi!" Itep I Rangsasa madaar. Di subane suud madaar buin lantas pules. Di subane pules I Rangsasa, aliha buin I Bintang Lara teken Ni Cili.
"Batu masepak, enggang iba enggang!" Enggang lantas batu ne masepak. Memesu lantas I Bintang Lara, tur kaorahin baan Ni Cili, "Nah adi, yan adi ngalih gagak petak, ditu kaja kangin laku, yan adi nepukin baingin gede, beten baingine ento ada tlaga, ditu suba adi ngoyong. Yan pade ada dedari kema masiram ditu di tlagane, paling men bajunne ane paling durina suud masiram.
- 150 -
