Kaca:Kembang Rampe Kasusastran Bali Purwa Buku 1.pdf/138

Saking Wikisource
Kaca puniki kavalidasi

24. I LENGAR

Ada tuturan satua anak muani balu, maumah di Banjar Kanginan, ngelah panak muani aukud madan I Lengar. Dening makelo suba bapan I Lengare balu, makeneh lantas ia buin ngalih kurenan. Lantas metain kone ia anak luh, anake luh ento masih balu, maumah di Banjar Kawanan. "Nyoman, Nyoman, beli anak pepolosan ngomong teken nyai. Kene beli uli makelo suba balu, nyai ja masih balu, beli ja suba ayahin nah Nyoman?", keto abet bapan I Lengare metain I Balu Kawanan. Masaut lantas I Balu Kawanan, "Beli Wayan, da Beli pedih, pocol Beli ngomong teken icang, icang sing ngisinin omong Beline, krana keto icang tusing demen ngelah panak kualon". "Baan beli ngelah panak, nyai tusing nyak teken beli?" "O, Beli Wayan", keto pasautne Ni Balu Kawan, mulih lantas bapan I Lengare. Suba jani neked jumah, bengong kone ia ngeneh-ngenehang omong Ni Balu Kawanane. "Ne kenkenang jani baan makeneh, i dewek dot pesan ngelah kurenan, ada anak luh ane cumpuin lakar anggon kurenan, mara petain tusing nyak, baan i dewek ngelah pianak kone. Lamun keto, senun I Lengare idup, dong tusing ia lakar ngenyakin i dewek. Ah kene ja baan. Bakal matiang tendasne I Lengar, dong nyakina ya i dewek teken Ni Balu Kawanan", keto kone kenehne bapan I Lengare, lantas ajakina pianakne kabian ngalap nyuh. "Lengar, Lengar, jalan kabian ngalap nyuh lan!" "Jalan", keto pasaut pianakne, lantas ia majalan ajaka bapanne. Suba jene neked di abianne, menek lantas bapan I Lengare ngalap nyuh. Pianakne kone konkona nudukin tur tundena nongos di bongkol nyuhe. Mara ia ngangget nyuh mula kajane, tundena kone panakne nongos ba dajanne. "Lengar paak dajanne laku nongos!", ngelodang kone lantas lakuna ulungan nyuhe. "Lengar paak danginne laku nongos!", keto abetne bapanne, paak danginne lantas I Lengar nongos, ngawangan kone ulungan nyuhe. Nganti telah buah nyuhe baana ngulungang masih sing kena-kena panakne. Tuun kone lantas Pan Lengare, buin punyan nyuhe

- 135 -