"Dempuawang, to kenapa jit ibane madugal?"
"Inggih Ratu Ayu, titiang negakin lungka-lungka dereng membusan".
"Dempuawang, dong ulihang daan awake!".
"Meneng Ratu Ayu meneng, payuke belong kudiang matri".
"Ririh iba Dempuawang, bakat dogen ban iba nyautin munyin nirane".
Keto kone reraosanidane Raden Galuh ajaka I Dempuawang. Suba jene sanja, mantuk lantas kone Ida ka puri pagaluhan.
Kasuen-suen gelising satua, mobot kone Ida Raden Galuh. I Dempuawang suud kone lantas magoba bojog. Buin waluya jati dadi Mantring Koripan, tur ditu lantas Ida Raden Mantri nuturang saindik-indik raganidane ring Ida Raden Galuh, ditu lantas nyumingkinang pada ledang kayunidane, wireh mula Ida mamingsiki.
Kacrita Ida Sang Prabu miwah Ida Raden Mantring Daa makekalih mireng Ida Raden Galuh mobot pagaen 1 Dempuawang, lantas Ida bendu tur erang pakayunane dening putrane mrabi ring bojog. Lantas Ida sareng tetiga ka pagaluhan lakar ngamatiang I Dempuawang. Mara Ida rauh ditu, cingak Ida Raden Mantring Koripan mlinggih sareng Ida Raden Galuh, lantas Ida Sang Prabu ngandika ring Raden Galuh, nakenang anake ane sareng ajak Ida ditu, lantas Raden Galuh nguningang indike sakadi-kadi. Suba kone keto, lantas prejani Ida Sang Prabu Daa maputusan makta surat ka Koripan, ngaturin Ida Sang Prabu Koripan mangda rauh ka Daa, lakar mabuncingang Ida Raden Galuh ring Raden Mantring Koripan. Buin Ida maputusan ka Gegelang muah ka Singasari nglamar Ida Raden Galuh makekalih, masi lakar subarengan kapabuncingan di Daa ring Ida Raden Mantring Daa makekalih.
Tan critanan gelising satua suba pada adung pangraose, lantas Ida Raden Mantri makatetiga apisan kapabuncingang ring Raden Galuh makatetiga, tur kaajengin antuk Ida Sang Prabu Koripan, Gegelang muah Singasari.
- 134 -
