Sang Prabu mategul. Suba kone keto, lantas Ida Raden Mantri ma-
kekalih ka purian, dapetang Ida kone I Limbur sedek negak di
ambene. Ditu lantas I Limbur tebek Ida aji don lalange, tur sampel-
sampel Ida entungang Ida di pangkunge, lantas teka kone cicing
ajaka liu ngamah bangken I Limbure kanti telah. Di subane I
Limbur mati, buin kone Ida Raden Mantri makekalih medal, ditu
lantas Ida Sang Prabu ngidih urip teken Raden Mantri, lantas Ida
Sang Prabu muah kaulane makejang kakelesin. Di subane keles,
lantas Ida Sang Prabu ajaka menek ka praune teken Raden Mantri
makekalih. Teked ditu, dapetang Ida Sri Prameswari sedek mlinggih
sareng Raden Galuh, ditu lantas Ida Sang Prabu saup rabine, lantas
Ida Sri Prameswari bendu tur matbat Ida Sang Prabu. Mara keto,
lantas Ida Raden Mantri ne duuran matur ring Ida Sang Prabu,
"Inggih Ratu Sang Prabu, dados Cokor I Dewa jag nyaup anake
punika, sapesira se punika, kaden punika anake sane nyuun tain
siap ambul kuskusane sane tumbas titiang ring Cokor I Dewa.
Mara keto atur Idane Raden Mantri, lantas Ida Sang Prabu nangis
sambil Ida nuturang indik Idane sakadi-kadi, tur nyelsel raga, dening
kalonjok kayune nglinggihin atur I Limbure. Ditu lantas Ida Raden
Mantri makekalih kangen ring ajine, lantas Ida masi nguningang
indik Idane duk mara kakutang kanti kayang jani. Mara kone keto,
lantas saupa tangisina putrane, sambil Ida ngaksamaang raganidane
ring putra miwah Prameswari, tur prajani ajak Ida ka purian. Ditu
lantas Ida Sang Prabu maicaang kagunganidane ring putrane ma-
kekalih.
Kacrita jani Ida Raden Mantri ring Koripan, nuju peteng
Ida mlinggih kone di bale kambange di taman, lantas Ida mireng
raos ngambara, "Cening, Cening Mantring Koripan, jani suba teka
karman Ceninge, kema jani Cening luas ngaba prau takon-takonang
adan muah gobanne, bunga anggon ngupaang matakon. Buina lamun
ada anak ngupamaang gustinne bunga cempaka, gustin anake ento
suba ia lakar rabin Ceninge, tur Cening lakar masalin goba dadi
bojog madan I Dempuawang. Nanging da Cening jejeh, reh mula
keto pakardinidane Sanghyang Widi lakar matemuang Cening mrabi.
Yen suba mobot rabin Ceninge, sinah cening lakar buin magoba
manusa". Amonto kone raose ane pirenga teken Ida Mantring
Koripan, lantas Ida mantuk. Buin maninne Ida Raden Mantring
Koripan tangkil teken ajinne, nguningang raose ane pireng Ida di
taman, tur lantas Ida mapamit lakar ngumbara nglinggihin prau
ngrereh lakar karmanidane. Keto atur Idane Raden Mantri. Ida
- 131 -