Kaca:Kembang Rampe Kasusastran Bali Purwa Buku 1.pdf/13

Saking Wikisource
Kaca puniki kavalidasi

31. Mandor jalan tukang kawat,

   Magae kendor ngamah kuat.

32. Bedeg matrampa,

   Batun badung wadahin kisa,
   Kudu jegeg tuara nawang apa,
   Nyambung ladung tuara bisa.

33. Kulik-kulik di batan umah,

   patin madik maprada,
   nu cerik ngalih somah,
   lakar tidik tuara ada.

34. Menyan sampang menyan madu,

   ngalih ental seselikan,
   kaden gampang ngalih madu,
   doyan cengkal ne cerikan.

35. Nasi anget mwadah piring,

   nyanding basa mwadah ingka,
   bilang inget makita ngeling,
   rasa ia nyagjag teka.

36. Siap sangkur uling lawas,

   lampin bodag kaminyakin,
   tiang lacur dadi jlema,
   nyen kodag mangenyakin.

37. Siap galak di pasisi,

   bungkung tujuh pependokan,
   liat galak minab misi,
   mara jugjug manampokang.

38. Siap sangkur mlali di sema,

   teked di pondok katalinin,
   tiang lacur mlali kema,
   mara nengok kapalaibin.

39. Belahan pane belahan paso,

   clebingkah beten biu,
   ada kene ada keto,
   gumi linggah ajak liu.

- 10 -