21. I SIGIR, JLEMA TUAH ASIBAK
Ada kone satua anak luh daa, ubuh uling cenik, katinggalan rerama luh muani, nyama sing ia ngelah.
Kacrita Ni Ubuh sedekan maan ngidih padi. Padine ento jani lakar tebuka, dadi jemuha. Mara tuunanga keberanga di tanahe, kaget teka uli ja ujan bales masriok makecegan. Napi ngenggalang Ni Ubuh nuduk padinne abana menekan ka balene. Lantas luung endang ngenter aine banteng. Buin tuunanga padinne jemuha. Mara pragat ia ngeberang padi, ujan bales, buin gupuh nuduk padinne. Buin endang banteng aine ngenter, buin tuunanga padinne. Keto buin teka ujan bales peteng gumine, buin ia incuh nyaup-nyaup padinne palaib - palaibanga ka balenne. Keto dogen busan-busan menek tuunanga, kanti kenyel suba ia. Napi pedih basangne Ni Ubuh kanyonyol ia besus kene munyinne, "Sing tuah Betara Surya bebeki pesan teken awake lacur, neh ke tunggingina!" Plitina jit suryane. Suba keto teka endang luung nrengdeng aine. Ditu buin jumunina nuunang padinne keberanga di natahe, kanti tuh ngritik, tulus ia nebuk ngae baas. Nah suba jani keto, sayan - sayan makelo sayan masalin rasan awakne, mrasa oon baat, enduk-enduk atinne, kenehne buka anake punek-punek nunggil dauh rone pesu uabne mencur tur ngecuhcuh; gobanne dadi sayan gading lumlum, nyonyone sayan kenyat mrasa beeng, ditu ia keweh ngrasa ibanne, tuara kakeneh baana, makejang ngetaraang ia liwar ganti tur ngidam, suba magatra di nyonyo. Apan aketo, sedih ia Ni Ubuh, taunne tusing pesan taen nawang ngajak anak muani, "Dadi awake jani kene beling, apa men ketone, tusing sing ke dadi kekedekan gumi, mimbuh-mimbuh teken lacure, sing pragat baan. Widine ngundukang lacur awake"; Keto liu pesan sesambatanne Ni Ubuh, lemah peteng maselselan.
Nah kacrita jani di pedeman kadalon pulesne, ngipi ia ka-turunan baan Betara Surya, laut ngandika kene, "Nyai Ubuh, suud nyai sebet maselselan baan nyaine beling; ira ica teken nyai ngamaang nyai pianak. Nah melaang dogen ngaba, lekadne durian, da nyai ngencereweanga, manian lamun suba bisa ia nakonang bapa, patujuhin ngalih ira di tanggun langite barak kangin!" Mara amonto maanne ia di pangipian, lantas ia ngendusin.
- 118 -
