"Ngenken Adi mai jelap ngalih Embok?"
"Inggih Embok Ayu." Mara keto nangis kone lantas Ida Raden Galuh, eling Ida teken kasengsaranidane, tur kangen teken tresnan arine masameton, jantos ngumbara ngrereh raganidane, Ida Raden Mantri Made lantas dandan Ida kajak kampik umah Men Bekunge.
Ida Raden Mantri Koripan, angob pesan kone Ida nyingak indik Ni Wayan Waluhe buka keto.
"Nyen sih ento dandana teken Ni Wayan Waluh. Buina basanne dadi maadi bagus, embok-ayu; tong tara Ni Wayan Waluh anak menak tur ia manyama". Keto kone pakayunanidane Raden Mantri Koripan, pirenganga dogen kone bebaosan Ida Raden Galuh Daane sareng arinidane.
Raden Galuh Daa mabebaosan saling tangisin sareng arine, pada nuturang indik kasengsaran ragane. Mara Ida Raden Mantri Koripan mireng pangandikan Ida Raden Galuh Daa nuturang indike kapaling antuk Raden Galuh Singasari kanti madue oka buka jani, lantas Ida nampekin tur ngelut Ida Raden Galuh, "Adi Galuh, Adi Galuh, kalingane misan Beline ke Adi, tuara tawang Beli. Buina Adi maan anggona singlur teken I Galuh Singasari di pabuncingan, masih Beli tuara tau. Nah buat ento, da Adi nyebetang, apang Adi suka masih nganggon kabelogan Beline".
Matur Ida Raden Galuh, "Inggih Beli Mantri, buat nika tiang nenten ja nyebetang, yening titiang sebet meh tiang nenten driki napi nongos". Suba keto, ngaksama lantas Ida Raden Mantri Koripan teken Ida Raden Mantri Made, buat Idane tandruh tan nyapa Ida.
Kacrita jani di purian, Ida Sang Prabu ngati-ati Ida Raden Mantri, pelan suba lingsir masih tonden mantuk, dadi merang pesan kone kayunidane teken okane. "Ne kenken sih nyetne i nanak bagus, dadi pianake baana mamitra teken pianak Men Bekunge kencanina upahanga magenep-genepan, ne pianak gelahe sajaan dadi tra ringsunanga?" Keto kayunidane, lantas Ida ka taman kairing baan Patih ngrereh okanidane.
Sarauh Idane di taman, kapanggihin okanidane kari mreraosan sareng tetiga, ngraosang buat Raden Galuh Singasarine suba mobot satonden kambil antuk Raden Mantri Koripan.
Ngandika Ida Sang Prabu, "Nanak Bagus, uli semengan Aji ngati-ati Cening di puri, kaden buin kejepne teka, tusing, kaden
- 111 -
