Kaca:Kembang Rampe Kasusastran Bali Purwa Buku 1.pdf/111

Saking Wikisource
Kaca puniki kavalidasi

sira jerone dados semengan pesan jerone suba dini? Ngenken jerone ngalih waluh?" Meneng kone Ida Raden Galuh, dening Ida tonden uning ngraos. Pang kuda kaden Men Bekung matakon, masih Ida Raden Galuh tusing masaur - saur, begbeg klingas - klingus dogen kone Ida.

Dening keto pedalema kone Ida teken Men Bekung, Ida Raden Galuh lantas ajaka ka pondokne ka taman. Neked di pondokne, Ida Raden Galuh lantas siramanga, suud siramanga odakina. Suud keto Ida uning ngandika.

Matakon Men Bekung, "Jero anak istri, indaang nikaang ring titiang, sira jerone?"

Masaur Raden Galuh, "Nah Meme, da Meme nguyut-uyutang nah Meme! Nira raja putreng Daa, sangkal nira nongos beten laapan waluhe i tuni, nira ibisanja entunganga uli purian teken panyeroan I Galuh Singasarine". Nglantas kone Ida nuturang. saindik-indik Idane makejang uli palinga teken Raden Galuh Singasari. Men Bekung cengeh-cengeh dogen, kapiolasan madingehang pangandikan Ida Raden Galuh Daa.

Matur Men Bekung, "Inggih Ratu Dewa Ayu, sane mangkin sapunapi kayun Cokor I Dewa, jaga mantuk?"

"Nah Meme, nira sing ja mulih, krana mabudi tau teken pidabdab I Galuh Singasarine dini dadi rabi. Nah yen Meme lega, dini nira ngidih nasi teken Meme akaun siap selid sanja". "Inggih Ratu Ayu, yening sapunika, iriki sampun Cokor I Dewa nganggen titiang panjak belog".

"Nah buat totonan da suba dawananga, nanging kema Meme, yan di aapan anak da Meme mratu teken nira, akuin nira pianak kaukin Ni Wayan Waluh, apang nira tusing uningina teken i beli Mantri makadi teken I Galuh Singasari!"

"Inggih Ratu Dewa Ayu".

Sasukat Men Bekung ngajak Raden Galuh Daa, teka enggal kone ia matinggenan, asing angkuhanga gegaenne tuara ada tra mapikolih. Ida Raden Galuh karyanidane mabenang-benangan. luire ; nyongket, ngendek, muah ane len-lenan, tur pakaryanidane melah-melah.

Kacrita jani Raden Galuh Singasari, karyanidane masih mabenang-benangan, nangingke pakaryanidane tuara ada mleek, joh tandingne teken pakaryan Raden Galuh Daane. Sedek dina anu

- 108 -