Sedek dina anu, I Brakah lantas ngomong teken memenne,
"Meme, bin mani ajak ja tiang ka peken, apang tiang nawang peken".
Memenne masaut, "Da ja cening bareng ka peken, dokar
pada liu' nyanan liliga cening nyen".
I Brakah buin masaut, "Sing liliga apa tiang!"
Memenne buin masaut, "Nah, yen cening nyak ja di sisi
ngambahin, nyak meme ngajak cening kema". I Brakah kendel
pesan kenehne mara memenne nyak ngajak ia ka negara. Buin
maninne semengan pesan suba ia bangun, lantas ia ka peken, bareng-
bareng ajaka memenne. Di tengah jalan liu anake nyapatin ia kene,
"Ih Dukuh, nyai kija ngajak alu".
I Dukuh lantas masaut, "Panak tiange ene, ia nutug ka peken".
Makejang anake ngedekin I Dukuh, baane I Dukuh ngelah pianak
alu. Nangingke I Dukuh tusing sebet kenehne kakedekin. Sasubane
daganganne telah, lantas ia mulih. Sukat I Dukuh ngelah pianak
alu, lais-lais pesan ia madagang. Tur batinne liu-liu pesan.
Gelising crita, critaang jani I Brakah suba truna, lantas ia
ngomong teken memenne, "Meme, kema jani padikang tiang okan
Ida Sang Prabu!"
Memenne lantas masaut, "Yeh to nguda pangkah pesan, dong
bani meme matur teken Ida Sang Prabu, meh rejeka tekan meme".
I Brakah buin ngomong teken memenne, "Yeh Meme, tusing
bani Meme nindihin tiang baan urip memene. To kone Meme tresna
teken tiang. Diencenne Meme bani ngetohin tiang. Nah yen Meme
tusing bani lakar madikang tiang okan Ida Sang Prabu, tiang lakar
magedi uli dini". Mara I Brakah ngomong keto, lantas memenne
ngeling sambilanga ngomong kene, "Nah, yen Cening sarat pesan
nunden meme mamadik ka puri, meme tusing ja bani miwalin keneh
Ceninge. Nangingke gelahang bareng. Cening suba nawang, meme
anak tani. Jani meme tusing sebet, yen suba nindihin Cening. Krana
jani meme lakar majalan, nah ane engken kenehang Cening?"
I Brakah lantas masaut, "Titiang sing ja milihin buin, ane
encen ja kalugra". I Dukuh lantas ngenggalang ka puri. Tangkil
ring Ida Sang Prabu. Sang Prabu lantas ngandika, "Yeh nyai Dukuh
luh tumben. Saja nyai ngelah pianak alu?"
I Dukuh lantas matur sarwi nyumbah, "Inggih Ratu Sang
Prabu, sayuwakti titiang maderbe pianak mrupa alu".
Ida Sang Prabu buin ngandika, "Men, apa buatang nyai mai?"
- 100 -
