gaenne nebuk, lamun pagaen anake ajak tetelu. Nah selegang ja Cening magarapan, da runguanga anake meleng-melengan.
Ye matelek gati ja goban anake cerik, he nyen adan nyaine Ning?"
Matur Luh Gading, sambilanga kunuk mulang lunne, "Titiang Luh Gading nika".
Ngandika Siramadewi, "Yeh, ih, luung ja adanne, Luh Gading?"
Kacrita suba pada suud pada nebuk, Luh Gading paling maluna mapamit. Satekedne Luh Gading jumah, tuturanga undukne dadi kekedekan, dadi jejailan. Buin pidanne buin Luh Gading ngayah ka puri wireh di puri anake lakar nyait. Tan mari masih ia maboreh sera. Anake pada nyait tamas, yadin sampean aji semat, Nanging Ni Luh Gading nyait aji medang tiing ane abana uli jumah, pagaenne ngonanga pesan teken anake makejang wireh alus magenja, buina tusing ngenah jejaitanne wireh aji medang nanging tekek. Kayang praratune masih makejang pada ngon teken paundukanne Luh Gading. Raden Mantri Koripan, tan mari ngirik-irikin ia, nganti tusing magedi-gedi uli di anake nyait. Raden Mantri lantas ngandika, "Ih Luh, nyai madan Luh Gading? Lan dini ngoyong nyak!"
Matur Luh Gading, "Titiang pamit". Raden Mantri lantas ngandika teken Siramadewi, "Ih, Bibi, aeng tawahne Luh Gading nyait sampean, aji medang anggona, baan tekek, buin melahan pesan pagaenne padaang teken anake lenan".
Ngandika Siramadewi, "Inggih, malah dayanin teka makejang bisaina". Buin ngandika Raden Mantri teken Luh Gading, "Ih Luh, indaang satuain beli, teka dot gati makita madingehang satua!"
Matur Luh Gading, "Titiang pamit, titiang tan uning masatua". Lantas anake lenan kapangandikaang nyatua, nanging Raden Mantri tusing ja satuane pirenganga, itep ja Ida sledat - sledet nyingakin Luh Gading.
Kacrita suba pragat majejaitan, makejang anake pada mapamit uli puri. Petenge Raden Mantri tusing sirep, tuah Luh Gading magantung-gantung di kayun. Suba paakan lemah, mara Ida dadi sirep, lantas Ida nyumpenaang Luh Gading. Gelising satua, jani buin anake ngaturang pangayah ngae jaja, ia tusing buin maboreh sera, kewala meseh buka anake lenan. Beh ditu buin mawuwuh - wuwuh kajegeganne, macebuah buka bulan purnamane. Raden Mantri buin
- 97 -
