Kaca:Kembang Rampe Kasusastraan Bali Purwa Wewidangan I Buku II.pdf/98

Saking Wikisource
Kaca puniki kavalidasi

91

  1. Saling peluk, mabin saling ukut-ukut, tan sah nyesep layah, mlali susu tan mari, suarga luih, keneh sang atma di suarga.
  2. Tan kawuwus, Atmane nyai Ayu, layone kocapan, mangrempayak lumlum gading, sawang kenyung, jegege mangayang-ngayang.
  3. Raris rauh, i biang sareng i guru, mangraris mulihan, dapetang I Ayu mati, namping keris, mamusti nyakupang tangan.
  4. Biang guru, engsek nyangklek buka gebug, kaabin layone, ukut-ukut pepasihin, dewa ratu, dong pelihin Gusti pejah.
  5. Nyai Ayu, dong cingakin biang guru, lalis dewa ninggal, mangalahin titiang mati, Dewa Ayu, juang titiang enggal-enggal.
  6. Kabakta pesu, layone nyai Ayu, di bale mambenge, manglier luir kenying-kenying, ngawe sedih, pisagane mabiayuhan.
  7. Ada ngulun, mangeling pada pagelur, len masesambatan, ngaukin pada pajerit, dewa ayu, napi krana nyunduk raga.
  8. Saling gebug, I Biang teken I Guru, ada mambelasang, ada len mapepasihin, krana lampus, tuah guru jua makada.
  9. Braya rauh, manelokin nyai Ayu, ada ngaba jaja, nyai Ayu kakaukin, tong matangi, tiang ngabaang nyai jaja.
  10. Biang Ayu, mangeling mangurut entud, sedih mamulisah, mas i meme nyaí Cening, apang tindih, nyai ring I Pudak Sumekar.
  11. Pada rauh, misan mindon nyai Ayu, pada masesambatan, adang aba kasa putih, lakar rurub, munyinnya pada nyapaang.