Kaca puniki kavalidasi
90
- Mangrempuyuk, namping keris sedanipun, macakup tangane, mairib anak mamusti, gading lumlum, layone mangayang-ngayang.
- Tan kawuwus, layone nyai Ayu, kocap Sanghyang Atma, mangungsi ka dalem gelis, sampun rauh, atmane kakung mamapag.
- Nene kakung, nyaup atmane bau rauh, ngabin ngaras-aras, rauh saja Dewa Gusti, tindih tuhu, nyai Ayu teken titiang.
- Raris katur, atmane nyai Ayu, ring Betari Durga, Betari ngandika aris, ajak mai, nira ngicen tetebasan.
- Nyai Ayu, mabersih masisig mambuh, raris kicen wastra, panganggone murub endih, malih bungkung, patitis lan sekar emas.
- Istri kakung, mangrangsuk busana alus, tingkah anak suka, kedek-kedek kenying-kenying, istri kakung, makiken matetebasan.
- Saget rauh, tetebasan makuung, maduluran tirta, panglukatan nene luih, panglelatih, tirta mreta pabresihan.
- Nuli rauh, Betari ngandika alus, mrene Sanghyang Atma, sang atma kalimid-limid, matur bakti, saha manyembah Betara.
- Sanghyang Atma, raris munggah istri kakung, natab tetebasan, "Sandikan Betari mangkin, sami sampun, Sang Atma katiben tirta".
- Wus katiban, tirta panglukatan dumun, timbal pabresihan, natab sesayut ne mangkin, istri kakung, sampun ia majaya-jaya.
- Mimbuh ayu, Sang Atma istri kakung, tan pada sukan, kaicen pamreman lewih, galeng tumpuk, miwah kasur kembi solas.
- Malih ipun, kíien panjak istri kakung, luih kasukane, pakedek pakenyung sai, medem bangun, ne kakung tampah pangemban.
