Kaca puniki kavalidasi
89
- naanang, kasasar titiang nu urip, sedih bekut, suka yan lebur ring kawah.
- Lamun sampun, sareng Beli Bagus lampus, nadian Cikrabala, mangrebut saha nigtig, titiang purun, masasangra di Panangsaran.
- Kawah endut, kawah tai muah magantung, tuara titiang maras, lamun sampun sareng Beli, yen macebur, titiang aturang dumunan.
- Titiang tuhu, tuara pacang ngelong sanggup, ne subanan titiang, gelis karebut kasisi, sareng liu, kranan titiang wangde pejah.
- Titiang eluh, yen tan kabelasang iju, meh titiang nyidaang, manugtug Beli Bagus mati, masarengan, mati matunggalan bangbang.
- Atmane kakung, mamargi mangrantun-rantun, ngantosang raine, ka pura dalem mangraris, mangu-mangu, atmane I Pudak Sumekar.
- Kaget rauh, Betari Durga mangalu, sareng Sang Kalika, nyaga sang atma di margi, raris nuus, atma paran kita prapta.
- Luih bagus, kita atma wau rauh, paran kerana pejah, sang atma umatur bakti, duh pukulun, titiang atma wong kasasar.
- Ratu Agung, kerana titiang lampus, malaibang gegelan, katutugan kaprabutin, tur kasuduk, ring kadang dane I Mirah.
- Sapunika, awinan titiang rauh, parek ring I Dewa, ica Dewa mangraosin, titiang ulangun, ring nyai Ayu di pada.
- Yen tan rauh, nene mangkin nyai Ayu, mriki sareng titiang, lehengan tiang nyeburin, kawah agung, Betari raris ngandika.
- Atma rurus, esti maring istrinipun, di dalem antosang, jani nira kemo ngalih, nyai Ayu, apang enggal bareng pejah.