Kaca puniki kavalidasi
1.29 GEGURITAN PUDAK SUMEKAR
Puh Pucung
- Nyai Ayu, kapendak tingal ia kenyung, kasmaran atine, pada ia cumpu di ati, wruhing semu, luh muani pada makalah.
- Nene kakung, mamargi ngelati landu, ne istri durian, pada ia mangungsi mulih, nungkap gunung, sampin masurupang surya.
- Nuju suung, katemu pada manguntul, ngedalem pesune, manyingak mamaling-maling, mara epuh, ne lanang tan kena mojar.
- Beli Bagus, Beli ne marekan bagus, Dewa Gusti titiang, titiang nunas ican Beli, ne buin telun, plaibang titiang banjar.
- Sampun rauh, di desa anake jujur, jangkepang ragane, idepang awak mabuncing, munyin kulkul, idepang munyin gamelan.
- Tuu-tuu, mirah titiang nyai Ayu, jani masan kapaat, apa tindih teken munyi, nene kakung, manyaup raris mangaras.
- Telung atus, parekan anake agung, tuara titiang mendra, buka tuara buka Beli, tuhu bagus, buka Rejuna di wayang.
- Aduh tuhu, mirah Beli nyai Ayu, katah daane melah, buka tuara buka nyai, pipi alus, susune nyotong Galungan.
- Kenyem nyunyur, kadi gula mawor madu, dewa buka belah, tangkah titiange ngiwasin, tuhu ayu, tulen dedari otama.
- Beli Bagus, sampun peteng margi mantuk, titiang nunas sepah, ne lanang mangaras pipi, nyai Ayu, sepah tinarimeng waja.
- Dereng tutug, gelisan kulkule bulus, tan gingsir manahnya, ne istri mangrasa ati, nene kakung, manyaup raris mangaras.
87
