Kaca puniki kavalidasi
66
- balian epot, pan Burayut mituturin, "Siu naun, nerakannyane temuang".
- "Jani todong nira likad, kene salah keto pelih, yen nira paksa nrodos, katon tani ngidep munyi, ne buka kalijani, kadondonan tani mampuh, nyen jua ne kasalahang, pan Burayut kayang jani, bas kadurus, uling bau pangantenan.
- Bas mangae san tuturan, kuate maningeh munyi, wangkidina pisan pindo, yen kapisaga malali, teka tuah mangembusin, tampar yen dapetang nunun, yen nira sedek di paon, yen nira ngendihang api, tuah nrungkuk, tong dusin buung manyakan".
- Keto munyinnyane pongah, nanangan mangalih tangkis, "Ya manguda Siga keto, yen kola salahang Naní, tuah Siga ko di jani, mangidam mang amah yuyu, ia ke manakah kento, singnya ia manglalahin, sangkan liu, panake makrenyedan".
- Dadi enduh makadadua, pada manglegaang ati, tan kocap suba makelo, pianaknyane pada kelih, to ne muani-muani, masekaya pada mampuh, pada mangidep badah, ne luh-luh pada kelih, ayu-ayu, liu anake nyaumang.
- I Pemayun ne kocapan, bas melas ngenyudang ati, boke agaliwatin wangkong, alise tajep maingid, ules masawang tangi, madapan angsane ungu, yen nyerere maliat, maseledet buka tatit, yan matemu, pepantese tuah dreman.
- Luih Gonane madenan, bas melas mangalik-alik, mangranyab rawit bonyo, untune mangiwang endih, ngeredep buka tatit, tetingale nunjung biru, alis tajep mabengad, ngasorang kampid surindit, ulat rengu, kenyunge manis malenyad.
- Bane ayu kadaatan, ne Nyoman tuara nandingin, boke samah mangerebo, langsing lanjar sada aring, awak ngurangka ramping, muannyane molok lumlum, buka bulan purnama, matetingale kaduk bangkit, ules lembut, madapan angsoka liman.
- Nyai Ketut ne kelihan, ulese magatra wilis, boke samah
