Kaca puniki kavalidasi
61
- ngenah, ento Putrine katuntun, ban Dewagung putra, ayune tan patanding, jeneng Dedari Supraba, ka jagate bau tumurun.
- Yening putrining Nrepati Ratu dija, maputra ayu nulus, duk encen kapupu, antuk Ida Nrepasiwi, ento kaemengang, tur kenehnya pada linyun, angde buka ngidam, ngenot ne kamelidin, rujak epoh mayeh cuka, paketeltel poose enyuh.
- Liu solahne mabalih maruyuan, jeljel ngapitang rurung, sambulan mandulu, deeng mapeed mamargi, manginterang payas, keto samanya yen apus, putrine makejang, padabdabe mamargi, dening makejang mapayas, ludin warnane ayu-ayu.
- Kacerita sang mamargi suba nincap, benengan alun-alun, paseba jro agung, Sang Prabu lan pramiswari, kalih Raja putra, Sing amantri suba ditu, saisining pura, makejang ketog titih, ngiringang Sang Prabu kodal, mangantosang Rahaden Inu.
- Tuting baudanda sami ditu nampiang, sang mamargi winuus, satekede ditu, janggel umarek Sang Aji, Raden Inu miwah, Candrakirana sang arum, putrini makejang, masih mabriuk sami, mapamit ring pramiswari, kalih teken Ida Sang Prabu.
- Sinarengan ang abakti kacerita, mangkin Rahaden Inu, tumuli maatur, "Duh pukulun Sri Bupati, kalih pramiswari, sane mangkin titiang Ratu, pamit ring Sang Nata, pangestunta sang Aji, punika tunas titiang, wantah nunas krahayun.
- Kaduluran pujastining Narendra, titiang prasami lanus, tan wenten mamanggih, pancabayane ring margi, sapunika Dewa, atur titiang Sanghulun, ri jeng Sri Narendra, miwah ring pramiswari, kenakang ring pakayunan, atur titiang yan wenten sauh".
- Keto ature tuan Mantri tan apanjang, pramiswari mangrungu, sue tan pasaur, makamiwah Sri Bupati, reh kangen kalintang, kayune ring Raden Inu, masih sakamatyan, kascaryan jroning ati, nyingak sang anyar katingal, nanging lepya nakenang jujut.
