Kaca:Kembang Rampe Kasusastraan Bali Purwa Wewidangan I Buku II.pdf/64

Saking Wikisource
Kaca puniki kavalidasi

52

  1. Sausan mangkin anadah, kawuwusan Raden Dewi, munggah dane ring paturon, pawongan sampun aturu, saget sampun dauh lima, kaden Dewi, tan polih ida anidra.
  2. Buka ada mangrubeda, mangrurasak- mangrurisik, Iwir kena pijer di turon, kadi kekasur biluluk, wau aturu siana sakedap, Raden Dewi, saget dane manyumpena.
  3. Sareng lan Mantri Koripan, ne kasub bagus di Bali, mapangku-pangku di turon, tumulia matangi lungguh, kapupungan tumuli nyambat, "Beli Mantri, dija Beli magenah.
  4. Beli manyakitin titiang, buka mekane pabalih, buin pidan sareng saroron, ngalam-alamin katemu, kapa jani keman titiang, wiakti Beli, ngwisianin keneh setata".
  5. Ken Bayan Sangit atangia, sami kagiat manyagjagin, laut ja sami matakon, "Sapasira Ratu Ditu, ulat I Dewa marencang, siangnya nawi, I Dewa sareng wong lanang".
  6. Rahaden Galuh ngandika, "Ira ko bau mangipi, pindannya reko di turon, pinangko dening wong bagus, Raden Mantri ring Koripan, ne di Bali maipi ko teken nira.
  7. Apa ko jani mekada, sangkan ira buka jani, tuara komeh kenehe matra, baya tuah Hyang Widi nuduh, sangkan ira manyumpena", baya gati, ne jani buduh-buduhan.
  8. Dijaa baliane kocap, wisesa bakal ngubadin, masa tong sida baanya, yan kene-kene ibuk, ibuk paling mangulisah, twah di ati, magantung-gantung di mata.
  9. Yan to ne bakat ngipiang, teka mangubadin jani, masa tong ya enggal ilang, sakite di jroning kayun, sakit pingit to adannya, tuara dadi, anak manawang lakunya.
  10. Sumingkin kenehe pusang, seksek ibuk sai paling, yan kene ko temahnya, tan urung ngemasin antu, sing jalan-jalan manyepang, nene jani, sang Prabu twara manawang.
  11. Yan tuah dadi ban nglipurang, lipur-lipurang di ati,