Kaca puniki kavalidasi
1.18 GEGURITAN BAGUS UMBARA
Puh Ginada
- Ambul to ban nyritaang, ana kawarna malih, Sang Prabu Jongbiru reko, warnane bagus anulus, mabala ndatan paingan, agung lewih, tan kurang raja brana.
- Sami magedong-gedongan, emas mirah ratna lewih, tan kurang raja berana, mapupul di jero agung, dening upeti ngabulan, sangkan sugih, kastawa kajanapria.
- Rauhing ka bumi Jawa, ka Cina mwah ka Betawi, ka Herum mwah ka Solo, sami sih teken sang prabu, prabu anyakra buwana, sami asih, sajawa-jawa makejang.
- Dana upama ne liwat, teken wong Jawa ne sami, buka twara patandingan, ka Cina Bugis Melayu, yuta-yutaan ketian, tan paganti, icane sang naranata.
- Sawong Jongbiru ne pada, sami misinggih bupati, sasat Betara ring lemah, negara daating landuh, sanyeneng Ida Sang Nata, daat trepti, twara ada yan wikara.
- Pada masuka-sukanan, sawong Jongbirune samí, sami ngulurin indria, muah Ida Sang Nata Ratu, aputri tan painganan, nene mangkin, rupa wenten tigang dasa.
- Maputra wau sanunggal, warnaning daating lewih, wicaksana pradnyan reko, dadi Hyang Ratih anurun, sami ratune ngerutang, nene mangkin, anging ndatan kena conggah.
- Makakembanging negara, makadewaning diah lewih, makasarining kadatwan, mapupulan madu juruh, makapangalapan cita, sor tang gendis, kencak tur malih srenggara.
- Nikaang jauman katah, praida lan mantri lewih, katulak antuk sang katong, apang kemane bas puput, kadi mas winten mirah, munggwing peti, kayune Ida Sang Nata.
- Sampun surup Sang Hyang Surya, wengi dauh tiga mangkin, anadah sira sang katong, kalih Ida Raden Galuh, kalawan sri pramiswaria, rantenaji, sampun sami wus anadah.
56
