Kaca puniki kavalidasi
48
- Sampun prapta maring umah, Malingteba raris ya kabersihin, puput binersihan sampun, gelis kabakta ka sema, tinaneman mangke inurugan sampun, miwah kalawan pangesan, catak salingkad sumanding.
- Kang wong ngiring sampun budal, prapta ring umah tasira agelis, enengakena puniku, sane ring mercapada, kacarita atmane sang sampun lampus, agelis prapta maring suarga, atmane akeh kapanggih.
- Sami pada berag-berag, tan paneda muah tan panginum sami, atmane Malingtebaku, kagaokan tuminggal, atetakon ujare asemu sendu, kangen mangke maring raga, tanurung tuah sapuniki.
- Atmane I Malingteba, jejeh masa tan urung sapuniki, katon atma pada ngun-ngun, tuara kaicen. teda, dadi merang I Malingteba puniku, asru ta pangupapira, maring sang atma mangeki.
- "Ih sakweh sira sang atma, paran sira karaning sapuniki, sami pada berag ngun-ngun, tuara ke kicen teda", anyabran dina sang atma inangke sumaur, "Norana kaicen teda, nyabran seraina wengi.
- Nging ada paicanida, Hyang Betara don tabiane puniki, yan hana ulunganipun, ika kawasa tadah, yan tan hana tan kawasa alap iku, yan inalap kasisipang, kaborbor miwah katigtig".
- I Malingteba angucap, "Mangke ingsun angamet iku mangkin", raris munggah sira asru, angalap daun tabia, akeh ulung enak sang atma anuduk, tur sami pada andah, lanang wadon sami ambukti.
- Maider I Malingteba, angulati sangu sang atma mangkin, sami pada raya-ruyu, tumut ring Malingteba, pada bungah rupane kulimis iku, awiatara bu saulan, pada ebuh raganeki.
- I Malingteba angucap, ring sang atma "Ih sira kantun driki, ingsun parek ring Hyang Ratu," tumuli raris munggah, nulia prapti sira rikang kubon agung, akeh punang tetanduran, pada mawoh ika sami.