Kaca puniki kavalidasi
47
- Tunas titiang teken Bapa, apang ica Bapa mangda nagingin, sasikep catak puniku, miwah slingkad pangesan, pacang gawan titiang parek ring Hyang Ratu, apang ada ceritaang tingkahe ngaduh mamaling.
- Punika ne tunas titiang, maring Bapa ica sami nagingin", Reramannyane masaur, "Enah suba ambultoan, Bapa usan manyembadain cai Bagus, apan suba pagentosan, titah Widine nyakitin".
- I Malingteba punika, ngelah switra De Teleh araneki, iya tuah sugih ttu, dana teken beraya, apan lintang jele melah tuah kapupu, tuara ya bisa daridra, teken anak tiwas sugih.
- Lewih ring I Malingteba, lanang wadon tuah pada mangasihin, twara ya ngelenin semu, ken anak jele melah, apan sami tingkahe mabraya tuu, liu pada manggaokang, lanang wadon cerik kelih.
- Puput reke sapunika, I Malingteba ya kocapan mangkin, jangkep sasengkeranipun, mantuk sira ka suargan, nulia pejah matine mamaling enyuh, kagegerang ban sang ngelah, katumbak ngemasin mati.
- Kalih sampun kasupeksa, ring Sang Kerta tingkahe ngemasin mati, dosane mamaling enyuh, karaning ipun pejah, sanga kerta tumuli asru, "Enah suba apan yogya, tingkahe ngemasin mati".
- Sampun lumbrah di negara, satingkahnyane ngemasin mati, I Malingteba puniku, reramannyane teka, mamereksa maring sang Kerta umatur "Pukulun kaula neda, matur ring paduka Aji.
- Yan tan maawinan iwang, kaula matur ring Paduka Nrepati, kaula mangke pukulun, manunas panugraha, da sampura mangke ring ayun I Ratu, punika ne tunas titiang, watanganipune mangkin".
- Anake Agung ngandika, "Nah suba Maman eda malih-malih, nah kema ajak ia mantuk, ia I Malingteba", "Titiang ngiring sandikan Cokor I Ratu, titiang mapamit" Manyumbah, tumuli raris mamargi.
