Kaca puniki kavalidasi
20
- tak malengis pender mangalup, mapunyaan jumah daa, di ati meled mabuncing.
Puh Sinom
- I Lelasan kenyem nimbal, "Saja Katak beneh gati, nanging yang katandruhang, yan keneh jadmane tunggil, makejang nagih sugih, sangkan ngalih mincang-mincung di goba mabinaan, kapatutang mangelenin, ada tulus, mapaulah kamelahan.
- Ada ne demen ngupaya, mamasangang daya lengit, dengklap-dengklep ka pisaga, ngintip umah anak sepi, anake buka cai, uling ilu bapa tau, yen tuara mangupaya, tong melutin tlengis pasil, nagih gugu, manuh nyingse somah timpal.
- Makamulan baan pongah, etuh dangkale ngabanin, juang kewala mabaan, mangisinin legan ati, tuara da bisa imbih, yadin macangkling maimpus, kajekjek baan timpal, idupe satengah mati, masih nu, nyalanang keneh dursila."
- Keto munyin I Lelasan, mawangwang tur majengahin, I Katak ya bangun kroda, makiret mabinder nuding, "He iba luun gumi, letuh ibane kadurus, pantes ne buka iba, mamandusin tain sampi, krana letuh, lekad uli luun bangbang.
- Eda iba matempilang, kapatutan teken kai, kalih tuara kai suka, manempil tekening bacin, yadiapin iba sugih, kai tuara taen nyatu, yadiapin iba bisa, kai tuara malajahin, yadin kasub, kai tuara angob pisan.
- Yadiapin iba purusa, kai tuara manyirigin, nah pidan ja keneh iba, iba kanggonya milihin, ne jani yadin mani, pilihin tongos mapagut, di gunung yadin di jurang, di tegal yadin di carik, dong masaut, apang kai maningehang."
- Aketo munyin I Katak, matbat saha mangumbangin, I Lelasan ngrasa jengah, bangun manyagur manindih, I Katak sebet manangkis, makecos ngincang mabiluk, I Lelasan wiweka, manyingse manyaup batis, magelebug
