Kaca puniki kavalidasi
245
gelising cerita reko, duur yusan dane mangkin, tapa brata ginlar raris, ring Gokarna Adriku, irika ida nangun yusa, mangastawa Sanghyang Widi, sami kukuh, durmanggala linaksana.
Puh Durma
- Kacarita yogan dane Sang Rawana, laksa tahun dane makerti, nangken siu tiban, sirah dane tunggal, kakepus kanggen samidi, raris kapulang, ring kunda kanggen uti.
- Meh tlasang sirah dane kapara muka, sueca Ida Hyang Pasupati, turun ida mahiang, Sang Rawana manyembah, Sanghyang Brahma ngandika aris, "Uduh sayang, apa sadia ngastawa Kaki".
- Sang Rawana matur sarwi saha sembah, "Titiang naweg nunas urip, mangden Betara ledang, nganggen titiang parekan, mangda titiang prekoseng jurit, bur buah swah, tumungkul ngaturang bakti.
- Dewa Yaksa wil kalawan gandarwa, widiadara-widiadari, manusa jadma garuda, muang mahasura, awedi kabeh ring mami, yan prasangga, basmi buta tan pangundili".
- Sanghyang Brahma mastusken nira, kalinggan asing pinereh, ngguhing Ida Hyang Asung Waranugra, "Madak murdan Cening malwi, ring samara, sakama-kama rakteng jurit".
- Wus Sang Rowana kapaica waranugera, Kumbakarna katakenin, "Uduh Buyut Kumbakarna, apa sadian cai ngastawa, nah tuturang teken Kaki, mangden tatas," Kumbakarna matur aris.
- "Titiang naweg nunas lugra ring Betara, inggih Hyang Pasupati, Betara ngawiwenang, pramananing jagat, sukasada ikang anisti, mangda ledang, sueca Betara maicanin".
- Dening luih panidine Sang Kumbakarna, sungsut Betara maminehin, kalawan Hyang Nawasanga, osek ring pakayunan, yang pade jani lugrahin, tan urungan, kalebur ikang bumi.
