Kaca puniki kavalidasi
241
- wenten kamranan sal, makadi tan karosian.
- Nanging yan ipun mayus mangiskis, maawinan, padang ipun samah, tegeh ngungkulin padine, mawastu gelis embud, sapunika kaucap Gusti, jelen anake ampah, yan yasan I Ratu, pitui kajanapria, kanggen suluh, ring jagate makasami, sang muatang karahayuan.
- Sang Pendita kadi Sanghyang Sasih, daat asing lewihing suteja, wit kotaman I Ratune, ngaledangin Sang Wiku, metu saking kayune lewih, patut pisan sadiaang, pangamíte Ratu, mangda mapikolih Dewa, karahayuan, punika jagate sami, jati tan patandingan".
- Atur Sang Undawane ngenani, kapatut antuk, Ida Sang Nata, yan wetun pangandikane, mamanis lintang arum, nyandang kalewihang pitui, antuk Ida Sang Nata, hiun Sang jayeng pangrus, kenak wiakti mamirengang, saluir atur, dane Sang Udawa yukti, luir pusuhing salaga.
- Kaginan kapanesan tan mari, kala kembang, ring wengi kasabehan, gelis Sang Prabu Kesawa, ngranjing ka jero kadatun, ring genahe ngraos ne nguni, Sang Rajaputra Samba, mangkin wus malungguh, ring ajeng Ida Sang Nata, kapasihin, saha kicen sepah wangi, kayune wekasing nyag.
- Maawinan toyaning pangaksi, deres sembah, mijil tan paampetan, antuke mekek tangise, saha ngandika arum, wireh ida daating asih, "Dewan Bapa I Dews, sing saking las guru, pakewehe manjalanang. saking tuhu, tresnam Bapane ring Cening, da ke Cening tiksena.
- Ring sapatuduh Bapane jani, buka Cening, makajiwan Bapa, dikapan tuara patute, Bapa tresna masunu, ne pindrih Bapa teken Cening kamolihane jua, nulusang manemu, kagungane mautama, kumandelang, Bapa jani tuah Cening, idihin Bapa sraya.
- Kalih magehang gaene ugi, makadinya, mangde manggaenang, nemu lewih kagunane, tuah Cening satuhu, daranain jagate sami, muah kajanuragan, teken karahayuan, sing len Cening makakranan, jani Bapa, mangadegang buka Cening, magehang landuhing jagat.
