Kaca puniki kavalidasi
1.7 GEGURITAN KATAK
Puh Demung
- Ampura titiang ngawitin, manyurat, ring dinanipun mungguh, Saniscara nuju, Kaliwon uku nemonin, wara Krulut kocap, tenggek lima tur rah kutus, panglonge ping lima, sakannya nemonin, siu domas seket kocap, yan matanggu eka akutus.
- Ditu manembenin nurah kakidungan, satuannya tan pabuku, masih apang nuduk, nyeritaang di pangawi, bas sai dingeh-ang, tunggal peteng uyut muug, di tengah nyarangan, rame mangoncang ngunci, anake madan Ni Koyan, nyandang wantah munggah ring kidung.
- Pindaang munyinnya makidung kumambang, lengeng sawat karungu, megat-megat alus, bandan jangih ngalik-alik, ngengkal masambilan, ngalih balang langan capung, dadi alah undang, I Katak mamiragi, osah sedih mahilehan, tan pa-ngitung majalan aus.
- Makeneh-keneh di margi kenken baan, nayanang mangden payu, kapanggih matemu, deweke kuciwa tanding, odah ludin kah-kah, di engken ya pacang kerut, deweke mudiang, anake ayu pasti, jani manggawe paekan, teked ditu limuh macebung.
- Tur matingkah munyi paling sasolahan, kadi wewalen buduh, "Aduh Kayon Ayu, dong tulungin kuda Beli, tuah nyai mada, kene Beli kena antu, yan ring parimana, pedas nyai ngorahin, Beli bani matuiang, kalih sebeng nyaine culuk.
- Uli ilu baan nyai mangirutang, nanging Beli tan lina, duka truna bagus, bajang cenik ludin gait, nyai ngengkal, nyambangin Beli manglidung, jani mapulihang, nyidaang kapanggih, nyai nganggon guna Mandar, temahan dadi buduh ulangun.
- Suba matulungan beli teken balian, ne suba kasub weruh, kaungganan taksu, awas tekening panyakit, sakit betel tinggal, Beli manenungang ditu, panangkaning roga, ne ngawinang buduh paling, nyai ditu pedas ngenah, masang guna masrana kidung.
17
