Kaca puniki kavalidasi
236
- Mairib ngidih tulungan, mangortaang karusakane di pasih, kasangkala baan arus, wenten jukung pamancingan, makembaran bidaknyane tempuh arus, mirib susuning segara, putih nyalang lemuh nyangkih.
- Kapu-kapune tuh kambang, kaampehang baan angine ngasir-sir, mirib tranggana di pusung, sambeh ditu kaanyudang, wenten jukung ngulangunin tengahing laut, malayar ya sada sawat, saru baan ujan ngribis.
- Bene gede manyaga, ibuk awinan malabuh gelis, wenten jurangnyane ditu, ibuk ndulame Dewa, ngasih-asih tan caritanan puniku, kulangunan ring segara, mangkin sampun kalangkungin.
- Watek dewa matelasan, wau sinah Mahameru kaaksi, kadi jagate matumpuk, kadi spatikalingga, nyukcuk langit patut wantah jua kasumbung, ring jagate sinamian, cerita Sang Dewa sami.
- Sampun rauh sagerehan, ring Mahameru gununge lintang luih, cingak mangkin punyan nyambu, linggih Ida Sang hyang Siwa. kangun yasa kayun Ida Hyang Atanu, tan mari ngumandelang. asida sakayune mangkin.
- Kayune lintang angkara, pajantosan sengkala pacang kapangeih. sagetan linuh di gunung. ujan bales muah blabar, kilap tatit angin baret peteng libut. keruge tan pepegatan, linus mawor ujan angin.
- Magatik kayu lan sela, mangarudug mairib jineng kaaksi, katempuh baan angin linus, ngarudug matrayuhan, rubuh balbal kayu ring nyampihan gunung, jejeh sang watek dewata, dening durmenggala mangkin.