Kaca puniki kavalidasi
231
- Saking alit titiang i riki, mamarekan, banggiang Ratu titiang, i riki ngemasin mati, niki kris titiang Ratu. pisan angge manebekin, mangde titiang glis pejah, ri wekas titiang Ratu, malih titiang dadi jadma, mamarekan, mangiring Ratu Mas Manik, "Sang Syu suka mangucap,
- Apa krana Bli buka jani, mangraosang, mapikayun pisan, titiang mamputang Beli, cen makrana nagih lampus, tuah sedeng tohin jani, tui pisadiane kuna, dadi jag managih lampus, tuara titiang mangiringang, kayinida, yen pisan sakadi riin, suka titiang masarengang.
- Tuara Beli lacur sakadi mangkin, yen rasaang, dening Beli matingal, titiang i riki manatakin, sakit mana titiang Ratu, dening Beli tan kapanggih, wiakti Ratu manah titiang, angdeang kadi sampun, dening sampun wus kaaras, ring brahmana, tuara ia pacang mari, tan urung ngemasin palatra.
- Dija alih titiang Ratu mangkin, pakayunan, dening sampun telah, "Sang Bimaniu ne mangkin, ida mangaras Sang Ayu, di pamreman sareng kalih, sinampura Ratu titiang, mangawi lontar puniki, nanging kirangan pacang, tuna liwat, sinampura sane mangkin, Smarandana anggen ngundukang.
