Kaca puniki kavalidasi
225
- Antuk temes Neandikaang Ngoda tapa. Majalan padidiin. tuara majakan kapaksa kaentungang. antuk Sanghyang Indra ngwidi. nah suba titah. tulis gidate lempir.
- Sane ibi duke mapamit majalan. ring Sanghyang Sacipati. ampet dane pisan. tangise kasaruang, kataen pisan di ati. buat sedih ranca, jejep kacingak ngeling.
- Sane mangkin sampun doh mamargi sawat. tangise kalebangin. ngeling nuut marga. manyambat kesakitan. sanget mangolasang ati. nulame tawang. nyelsel pakarya riin.
- Muut margi nrebes yeh aksine medal. tuara da pegat mijil. ngelek anyong membah. anteng wastrane basag. kucut belus ban yeh aksi. enggor macabcab. mairib manik warih.
- Tui karasa antuk dane kawitanan. penter ngoda sulinggih. ne pageh matapa. sing patut mamencana, enggalan nepukin sedih, yadin nyidaang. tong kama suka panggih.
- Tuah enggalan pacang nemu pancabaya. di pageh sang sulinggih. tegeg ngwangun tapa. makanten pastunida. awake waya nepukin. tong bbung tama. reh madarsana sisip.
- Sakewala ne kapineh keelingang, abesik kapuponin, suecan Sanghyang Indra, punika jejer nyangcang, nyapuh ibuk Diah Arini, kayune ranca, rupa matinggal kidik.
- Yeh aksine kadi nambehin sarjawa, cecingak sayan manis, yen dane miasan, nyarere ngawe ginggang, kalesan sinjange tipis, ngimbuhin melah, ngantenang bancang ramping.
- Srak danane seret samar saru pirengang, pegat-pegat piragi, mawuwuh sranggana, sasebite ngandika, warnane dumilah ngendih, ngaleglog kusya, kecud matambeh bangkit.
- Yadin acun wenten kadi nambut brata, ne tebeng masasiih, wus kadoh mamarga, nyelag seleming jiada, saget ngenah saget ilid, ajahan ical, saru gulem nawengin.
