Kaca puniki kavalidasi
206
- amanis, ngajum twara suud, buka twara ada ngasorang, len ada mamaca nulis, mabebasan, apang ada padingehang.
- Suba suud ia matingkah, lantas ia majalan gelis, ngenah goa kabinawa, patapane Sang Kirti, gelis pada manampekin, sawatara johipun, tong ada telung depa, teken dedarine sami, bungas gua, marep kangin suba pedas.
- Mangerepin jurang sengka, tampak belane ngulapin, masawang nunden mulihen, rarisang Ratu meriki, puniki Sang Kirti, mangkin nyandang sampun susup, pamungpung ida nyumagiang, keto rasanya ngangsitin, di goane, buka tuara ada janma.
- Kewala to pedas ngenah, laut bungan pangabakti, tekening laad pasepan, nanging suba pada sepi, tuu samune ten sipi, suung kaludin buin mangmung, twara ada laad pasepan, padang ayane bau mentik, dedarine, ditu ia pada kasmaran.
- Laut ia pada ngawasang, leh sang patapa pasti, buka togog mase katon, buka bulan lumlum gading, dening siba maganti, teken bratane matemu, mangarcana ia bulanan, cayan tejane mangendih, muncar murub, galang teked ka ambara.
- Silane katon manapak, tui twara dadi gugih, mamusti hyangka angkihan, tutuk cunguhe patitis, irib buka mangalahin, macelup kajroning windu, sangkana dadi mamuna, panengene suba mari, dening suung, dadi maraga niskala.
- Dening suba kanten banya, ada munyinnya di ati, "Jawat keto ia sayangang, tan urung dadiannya paling, kalingke Sang Kirti," keto munyianyane ditu, "Ngandelang kajegegan, ande buka i sesapi, nagih maden, gunung buin pidan katekan".
- Ada nyilib tetingkahan, ngasor munyinnyane manying, sigsigan lantas matedoh, "Titiang atma Ni Dropadi rauh mamarek mriki, titiang mati sedih ilu, rauh titiang ka suargan, mangalih twara kapanggih, meling titiang, ring ican Beline suba".
