Kaca puniki kavalidasi
2.60 GEGURITAN KAMUK I GUSTI KETUT PUTU RING PANGEMPEL
Puh Durma
- Durung tetes I Gusti mamaos surat, ipun malih nglunturin, ngaturang kelewang, nyepeg sada mangetang, antuk kelewang maingid, magilap nyanyap, Sesangihane ceping.
- Gusti Agung Ketut kenginan kagiat, anging kamula kalis, purusa diguna, tong kengguh teken baya, yadin temah sapunapi, tega legawa, tlaga tanding jurit.
- "Kalingane Iba cicing perempuan, mat mabudi mati, sisan Selambodad, newek Pangkah cumangkah, ne suba Iba pilihin, engken kenehang, Iba tebekin kai".
- Sarwi nuding masasumbar, tuara pegat, ne tulen macan kuning, tosing Singaraja, saking medaning Widia, wetu masasumbar Bali, kawales lasia, gigir I Gusti Kanin.
- Magebegan yudane pakekalihan, I Gusti mambogolin, ngararis manyambak, nyagur noktok tan pegat, majuret pasaling panting, sue muderan, kawales malih keni.
- Lengen copah rudirane mamuncirat, kaelud malih kanin, prabu pasangaran, rahe keh sampun buyar, tangane kawales malih, runtuh nyegegag, makeeb tuara meling.
- Teken raga awananya mangulahang, nguseng I Gusti Istri, uyut mabiayuan, manyerit tuara pegat, kasepeg tangane keni, baan kalewang, I Gusti Ayu nangis.
- I pangayah malih gelis majeritan, kasabit nandeng kanin lengene di kiwa, malaib patidrupak, Gusti Putu Bagus Alit, sedek ngajengang, manampa piring putih.
- Kari rare durung uning ring pidabdab, kaujar kapulangin, katujune jokan, piringe keni belah, telas palengketik, Widi nyampingang, I Gusti kanin kidik.
- Pekasehe sane nangkil sami budal, pisaga glis nulungin nyama Batulogas, I Gede Sumbrang ganceng, tuman dang teka nganggalin, pageh legawa, purusa manandingin
185
