Kaca:Kembang Rampe Kasusastraan Bali Purwa Wewidangan I Buku II.pdf/166

Saking Wikisource
Kaca puniki kavalidasi

159

1.50 GEGURITAN RADEN SEPUTRA

Puh Sinom

  1. Ampurayang titiang Dewa, antuk Ida dane sami, malih sami nyaman tiang, sastra ageng tuna luih, tongos dang dadi eding, tani basa tani pupuh, abete masih bragah, milu mlajah manulis, sampun puput, matembang puh kasinoman.
  2. Tutur satua anggon gita, prajurit anom tur sakti, nakaran Raden Seputra, warna pekik tan patanding, peringete buka sangling, wajane atungtung jauh, magelung sinepit urang, paliat galak amanis, tuhu bagus, kadi Hyang Sama rabawana.
  3. Kadi Hyang anaking tinggal, luir Sanghyang Smara ingapti, pamargine magamparan, mirib twara nampak siti, mang laang saking langit, kawarna tingkahipun, nyusup tiba ring alas, lawan parekan kekalih, ajajuluk, Saulan kalih Sambada.
  4. Munggah gunung turun alas, akeh burone kapanggih, singga beruang lan gajah, macan kalawan kesari, buron badake tan mari, Raden Mantri semu guyu, mamirengang munyin buron, tur ia mamunyi manjrit, pada umung, kadi kerug asauran.
  5. Mangredeg anaring wiat, umpamane burone sami, Rahaden Putra ngandika, teken parekane kalih, "Yayi ayua gumingsir, acunduk ring buron agung, manawa arep prajaya, gumantia arep matenin, anganipun, sampun tan kurang prayatna."
  6. Parekane kalih ngucap, "Sampunang I Dewa malih, sampun titiang lintang yatna, manah titiange tumanding, lawan i buron sami, kaget macane titiange tumanding, lawan I buron sami, kaget macane mangelur, swarania lwir karbiak, Raden Saulan nangkisin, ngunus duung, kalih lan Raden Sambada.
  7. Macane prang kinembulan, solahe lwir kala geni, abang netrane murirak, welas lwir surya umijil, manyebak ma-