Kaca:Kembang Rampe Kasusastraan Bali Purwa Wewidangan I Buku II.pdf/157

Saking Wikisource
Kaca puniki kavalidasi

150

  1. Pidada Mandaru Sindu, punya ketikan prakawi, para marta sidi mantra, mangruat papaning dadi, dongkange matindik ketah, kapralina wus dinagdi.
  2. Sinang siptaning sang wiku, rug Lengkane kanggen wangsit, prasida Sang Ramadewa, njaya Sang Rawana juti, antuk senjata utama, guhya-wijaya kastuti.
  3. Gria Bungaya karuun, wak bajra adnyana sidi, kocap nyidaang mrajaya, Brahmana walaka sakti, tur wikan maraga katah, kuciwa ngadu kawagmin.
  4. Kawijayan Sanghyang Wisnu, ngalawan Sang Kagapati, kotaman Sanghyang Kesawa, sapunika saos malih, mewéh jiwa Sang Antaka, kaneng upas mungguwing jurit.
  5. Tan pendah Kasyapa wiku, njaya Sang Taksaka nguni, kamolihan Sang Pandita, sat madrewe sanjiwani, metria atulung jiwa, ngelarang Buda Kecapi.
  6. Kadiatmika sastra hetu, sida sidi mantra mandi, prana tatwa karagaang, klimosada-klimosadi, wruh ring pamangsiling atma, lwir angsengan manjing mijil.

Puh Gambuh

  1. Turah Jawi tembang alus, yan upami kumbang ngisep santun, ngrieng langa saos tembang, turah Bali, galak amanis ngatengkung, manglelenggik madong cengkok.
  2. Ngulan manis ngetuk kayun, ngasih-ngasih sana pinih kasub, Sasakan tembange becik piragi, lenyeh mambero ngalengut, mangalad santer makenyor.
  3. Ilegan swarane lemuh, renyah jangih pararasan pangus, ketik murah yaning swara kirang becik, Monyeh sasake kawuwus, yan tembang Megatruh sios.

Puh Megatruh

  1. Gending Jawa Kartasura tetep alus, alusan ring tembang riin, Sekar Media kalah alus, yang tembangang cara Bali, yadin Alis-alis Ijo.