Kaca puniki kavalidasi
131
- saliwah kaksi, aeng kaliwat-liwat, nengok ngulun-ngulun, ring sabilang pamesuan, sering kaintip kapanah nanging tan keni, sakti ngamaya-maya.
- Krana sedih watek Yadu Wresni, tar pepolah paminehing manah, sayan keh durmanggalane, bikule padarutdut, nuut marga ageng tan ajrih, yan wengi maring jadma, nyigit kuku rambut, malih wenten kapiarsa, suaran paksi belibis nyeos-nyeosin, niru celepuk tua.
- Suaran kambing ngulun kadi cicing, akeh ingon-ingoning manusa, akedik pangamahnyane, mapurisia aliu, masih kadi siptaning kali, sumingkin kabiaparan, sakeh watek Yadu, kasukan kali sengara, ngampah-ampah ring pandita lewih, tur mari among puja.
- Sayan katah nganggo nyalewadi, sampun kurang ring guru susrusa, akeh cekap ring gurune, sakewala sinuhun, Kresna Baladewa sang kalih, tan milu kabiaparan, nyingak salah wetu, Sanghyang Agnine ring kunda, tan dumilang katiban samida malih, suryane kawaspadan.
- Ris das surup kanten pada kuning, tur tejane kaarsa kawanda, sada katah soleh-soleh, nasi kari makudus, mambu bengu tur sada alid, malih wenten kapiarsa kadi salah wetu, sungune si Pancajanya, mangunguwung suarane tan saking upih, dadi wangsit sengara.
- Wus karaos ri sang ratu kalih, yan medal praya karusakan, sakatah Yadu wangsane, malih wenten kapangguh, Candra graha kalaning wengi, ring tanggal ping tiga wlas, eling duke dumun, durmanggalaning Korawa, masih Candra graha kalaning wengi, ring tanggal tlulas.
- Ketang wau telung dasa nem warsi, paletan durmanggala punika, ne sampun ring sane mangge, krana kabaos cukup, ngawangsitang rusaking bumi, malih ring ratri, istrining Sang Yadu, pada ngipi mangatonang Sanghyang Kala Sengara mauntu putih, ireng paraganira.
- Mangan sakeh wonging Dwarawati, sami tlas tan pepakantunan, sang watek Yuda langane, ngipi ring ratri mangguh, yen rabine kawalat sami, antuk buron wenara, pa-
