Kaca puniki kavalidasi
Puh Sinom
- Sampura dewa sampura, i belog maabet ririh, ngawe kidung tembang sinom, twara takut kakedekin, sok baan demen ati, tani kanda twara pupuh, abete masih bedak, tuara ada nandingin, cekar-cekur, masawang sundari belah.
- Panembene nyemak satua, ada to madan Pan Bungkling, jelema maapi belog, ririhnyane tidong gigis, anging ririhe mijalin, sai metu kang pangweruh, tui tong taen kalah, ban bisannyane mamunyi, pada nungkul, penditane tua bajang.
- Ida Gede Gangga Sura, suryan jagate di Bali, mula ririh kagaok, kebute tan sipi-sipi, sai lunga ngerayonin, sai nekaang sesantun, malihnya mawedana, kocap ento kaendonin saget rauh, Pan Bungkling nyongkok manyumb ah.
- Pedanda raris ngandika, "Pan Bungkling ngudiang mai, paekang ibane nongos, Pan Bungkling maatur raris, "Durusang icane ugi, ngaulaang titiang Ratu, titiang manunas ica, wenten karya titiang kedik, keni durus, memen titiange ka sema.
- Bau padem ibi sanja, nyánan titiang mamresihin, dening titiang mula totos, mangaskara uli nguni, titiang tan wenten uning, ring banten punika Ratu, malih kirangan ngarap, kabelet kirangan daging, doning ibuk, titiang mangkin mapangrasa.
- Polih titiang maangkuhan, inganan twah roras tali, yan titiang tan kasengkaon, malih limang dina mangkin, ngutang lantas makirim, akuda pacang sesan tun, nene karaos utama," Pedanda adeng nyaurin, "Da jua ibuk, lamun to kuangan ngarap.
- Lamun suba ada gelar, ne roang kaine dini, jelema ngawenya ento, ngawe banten sai-sai, kema iba nelokin, bantennyane suba puput, banten anak mangaskara, len to banten maresihin, raris bangun, Pan Bungkling jani natasang.
123
